Nýjasta þota Airbus í krefjandi prófunum í hvassviðri í Keflavík

Kristján Már Unnarsson skrifar 10. október 2023 20:40

Airbus A321-XLR lendir í 40 hnúta hliðarvindi í dag. Við slíkar aðstæður láta flugmenn hjólið sem snýr upp í vindinn snerta brautina fyrst, eins og hér er gert. Einar Árnason

Flugvélaframleiðandinn Airbus nýtti sér hvassviðrið á Íslandi í dag til flugprófana á nýjustu farþegaþotu sinni með því að lenda henni margsinnis í stífum hliðarvindi. Þetta er samskonar þota og ráðamenn Icelandair veðja á sem sína framtíðarvél.

Í fréttum Stöðvar 2 voru sýndar myndir frá lendingaræfingum A-321 XLR á Keflavíkurflugvelli í dag en hún er nýjasti meðlimur A-320 fjölskyldu Airbus. Ráðamenn Airbus stukku á tækifærið þegar þeir sáu veðurspána, flugu henni frá Toulouse í Frakklandi síðdegis í gær og hófu svo flugprófanir í morgun.

Flugvélin hoppar og skoppar á brautinni eftir fyrstu snertingu. Flugmennirnir gáfu síðan allt í botn og rifu hana strax í loftið aftur.Einar Árnason

Fyrir svona æfingar reyndust aðstæður sérlega hagstæðar. Sjá má hvernig flugmennirnir beita henni upp í vindinn í aðfluginu og rétta hana síðan af rétt fyrir snertingu þegar þeir lenda vélinni í 40 hnúta hliðarvindi, um 20 metrum á sekúndu.

Flugprófanir XLR-vélarinnar hófust fyrir sextán mánuðum og er stefnt að því að hún fari í farþegaflug fyrir mitt næsta ár. En fyrst þarf hún að standast raunir eins og þessa. Í einni lendingunni sést hún hoppa og skoppa eftir lendingu á flugbrautinni, flugmennirnir gefa svo allt í botn og rífa hana aftur upp í loftið.

Philippe Castaigns, tilraunaflugstjóri Airbus. Kútarnir fyrir aftan eru fylltir vökva sem dælt er á milli í þeim tilgangi að færa þyngdarpunkt vélarinnar til, eftir því sem þurfa þykir.Einar Árnason

Flugstjórinn Philippe Castaigns sagði reyndar að það hefði verið fyrirfram ákveðið að taka þarna snertilendingu. Hann sagðist þó ekki mega veita okkur viðtal né sýna okkur vélina að innanverðu en lýsti ánægju með hversu vel hefði gengið að prófa flugvélina í Keflavík í dag. Fjórtán manna starfslið Airbus kom með henni til landsins.

Icelandair-menn voru meðal þeirra sem fylgdust spenntir með lendingaræfingunum enda hafa þeir veðjað á þessa vél sem sína framtíðarþotu. Flugrekstrarstjórinn Haukur Reynisson nýtti tækifærið ásamt fleirum frá Icelandair til að fara um borð en félagið hefur gert samninga um kaup á allt að 25 svona vélum.

Haukur Reynisson flugstjóri og flugrekstrarstjóri Icelandair.Einar Árnason

„Mér líst alveg rosalega vel á gripinn. Þetta eru virkilega spennandi tímar framundan hjá fyrirtækinu að taka við Airbus eftir ár, fyrsta Airbusinum,“ segir Haukur.

„Við fáum reyndar ekki XLR-vélina fyrr en 2029. Við þurfum að bíða aðeins lengur eftir henni. Enda, eins og þið sjáið, þeir eru ennþá að test-fljúga vélinni. Hún er ekki alveg tilbúin til afhendingar strax.“

Flugvélin tók átta lendingar í Keflavík í dag.Einar Árnason

Haukur segir að það verði viðbrigði fyrir flugmenn Icelandair að fljúga Airbus en sjálfur er hann margreyndur Boeing-flugstjóri.

„Ég var einmitt að reyna að fletta upp í flugstjóranum á vélinni hérna áðan og spurði hann út í hver væri helsti munurinn. Hann sagði jú að það er svona meiri tölvuvæðing í Airbusinum heldur en Boeingnum. En hann sagði samt sem áður: Þetta er flugvél, sko.

Þannig að grunnhugmyndin er öll sú sama,“ segir flugrekstrarstjóri Icelandair.

Hér má sjá frétt Stöðvar 2:

Hér má sjá frétt um kaup Icelandair á A321-XLR síðastliðið sumar:

Fyrir tíu árum brotlenti rússnesk Sukhoi-farþegaþota í flugprófunum á Keflavíkurflugvelli, sem sjá má í þessari frétt:

Airbus Keflavíkurflugvöllur Icelandair Fréttir af flugi

Tengdar fréttir

Segir nýju Airbus-þoturnar fullkomnar fyrir Icelandair

Icelandair skrifaði í dag undir samning um kaup á allt að 25 Airbus-þotum. Jafnframt hefur félagið gert leigusamning um fjórar Airbus- þotur og verða þær fyrstu afhentar fyrir lok næsta árs.

6. júlí 2023 23:20

Nýja Airbus A321-þotan flugprófuð í fimbulkulda

Hin nýja langdræga Airbus A321XLR-þota gengst um þessar mundir undir viðamiklar flugprófanir og var hún á dögunum reynd í fimbulkulda. Prófanirnar fóru fram á Iqaluit-flugvellinum við Frobisher-flóa í Norður-Kanada þar sem Airbus segir að frostið hafi farið niður í allt að -40 gráður.

20. apríl 2023 09:29

Agndofa yfir lendingu Icelandair-vélar

Heldur athyglisvert myndband af lendingu Icelandair-vélar af gerðinni Boeing 767 birtist á YouTube í gær. Um er að ræða myndband af því þegar vél íslenska flugfélagsins lendir á Heathrow-flugvelli í London fimmtudaginn 29. nóvember við aðstæður sem verða að teljast gríðarlega erfiðar sökum vinds.

3. desember 2018 23:40

Airbus A-380 æfir erfiðar lendingar í Keflavík

Komið var með hina glænýju risaþotu Airbus til Íslands í dag í annað sinn á skömmum tíma til að prófa hvernig þessi stærsta farþegaþota heims reynist í erfiðum hliðarvindslendingum.

30. janúar 2007 18:47

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir