Þrír hengdir vegna hryðju­verkará­rásar í Bag­hdad árið 2016

Hryðjuverkasamtökin Ríki íslam lýstu árásinni á hendur sér.

Skrifstofa forsætisráðherrans Mohammed Shia al-Sudani greindi frá aftökunum en ekki frá nöfnum þeirra sem voru líflátnir. AFP hefur hins vegar eftir heimildarmanni að Ghazwan al-Zawbaee, sem talinn er hafa skipulagt árásina, hafi verið þeirra á meðal.

Um var að ræða sprengju í bifreið sem var lagt nærri vinsælli verslanamiðstöð í Karrada á meðan Ramadan stóð yfir. Mörg fórnarlambanna létust í eldsvoða í verslanamiðstöðinni í kjölfar sprengingarinnar.

Þrátt fyrir harðar aðgerðir gegn Ríki íslam í bæði Írak og Sýrlandi telja Sameinuðu þjóðirnar að liðsmenn samtakanna séu enn á bilinu 5 til 7 þúsund talsins og að um helmingur þeirra sé vopnaður.