Frá klukkan níu í dag hafa átján skjálftar mælst, flestir að dýpi 10 kílómetrar og sá stærsti 1,6 að stærð, klukkan 12:49.
Einar Hjörleifsson náttúruvásérfræðingur segir enga breytingu á óróamerkjum.
„Þetta var rætt í dag. Svona skjálftavirkni kemur í þyrpingum og það er ekkert núna sem telst óeðlilegt. Þetta verður áfram vaktað með mælum á svæðinu,“ segir Einar í samtali við Vísi.
Ekki hafi verið mældar breytingar á rafleiðni í nærliggjandi ám. „Við teljum þetta eðlilega bakgrunnsjarðskjálftavirkni sem mælist umhverfis eldstöðvarnar. Þetta þarf ekki að vera upphafið að neinni atburðarrás.“
