Bílar

Leiðtogabílarnir verða ekki fluttir úr landi

Máni Snær Þorláksson skrifar
Bílaflotinn verður ekki fluttur úr landi eins og upphaflega stóð til.
Bílaflotinn verður ekki fluttur úr landi eins og upphaflega stóð til. Vísir/Vilhelm

Fimmtíu Audi Q8 e-tron rafmagnsbílar voru fluttir inn til landsins til að aka leiðtogum Evrópuráðsins milli staða á meðan fundur þeirra í Hörpu fór fram í vikunni. Til stóð að flytja hluta flotans úr landi en sökum mikils áhuga verða engir bílanna fluttir úr landi.

Fram kemur í tilkynningu frá bílaumboðinu Heklu, sem flutti leiðtogabílana til landsins fyrir fundinn, að helmingur bílanna hafi þegar verið seldur. Verða þeir afhentir nýjum eigendum á næstu dögum.

Ríkið hafði samband við Heklu síðastliðið haust til að óska eftir bílum fyrir leiðtogafundinn. Friðbert Friðbertsson, forstjóri Heklu, segir að í kjölfarið hafi umboðið hafið samtal við þýska bifreiðaframleiðandann Audi. 

Friðbert segir að það hafi verið erfitt að ná öllum fimmtíu bílunum til landsins í tæka tíð. „Það reyndist þrautin þyngri því eins og mörgum er kunnugt um hefur stríðið í Úkraínu og Kórónuveirufaraldurinn sett strik í reikninginn hvað varðar aðfangakeðju með íhluti og búnað í rafmagnsbíla og því hefur reynst erfitt að fá bíla,“ er haft eftir forstjóranum í tilkynningunni.

„Umboðið þurfti því að hafa töluvert fyrir því að fá þetta magn til landsins enda um nýjan bíl að ræða sem er framleiddur í takmörkuðu magni, enn sem komið er.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



×