Erlent

Sagðir hafa ráðið sama lögmanninn

Máni Snær Þorláksson skrifar
Don Lemon og Tucker Carlson eru sagðir hafa ráðið sama lögmanninn. Þeir misstu báðir vinnuna í gær.
Don Lemon og Tucker Carlson eru sagðir hafa ráðið sama lögmanninn. Þeir misstu báðir vinnuna í gær. Getty/Mike Copolla/Jason Koerner

Fjölmiðlamennirnir Tucker Carlson og Don Lemon eiga það sameiginlegt að hafa báðir misst vinnuna í gær. Carlson hætti hjá Fox News og Lemon var rekinn frá CNN. Það er þó ekki það eina sem þeir eiga sameiginlegt því þeir eru sagðir hafa báðir ráðið sama stjörnulögmanninn til að hjálpa sér vegna starfslokanna.

Lögmaðurinn sem um ræðir heitir Bryan Freedman en sá er meðal annars þekktur fyrir að hjálpa sjónvarpsfólki að fá miklar bætur frá fyrirtækjum efttir að leiðir þeirra skilja. Þá er hann einnig lögmaður leikarans Vin Diesel, leikstjórans Quentin Tarantino og söngkonunnar Mariah Carey. 

New York Times greindi frá því í gærkvöldi að Lemon væri búinn að ráða Freedman og samkvæmt heimildum Business Insider hefur Carlson gert slíkt hið sama. Brian Stelter, fyrrverandi fréttamaður CNN, fullyrðir einnig að Carlson og Lemon hafi báðir ráðið Freedman í færslu sem hann birtir á samfélagsmiðlinum Twitter. Hann hefur þó ekki fengið það staðfest frá Freedman.

Þeir Carlson og Lemon virðast báðir vera ósáttir með hvernig starfslokum þeirra var háttað. Carlson segist einungis hafa fengið að vita það að hann væri að hætta tíu mínútum áður en það var tilkynnt opinberlega. Þá segist Lemon hafa fengið að heyra það frá umboðsmanni sínum að hann hefði verið rekinn en ekki yfirmönnum sínum.

„Ég er orðlaus. Eftir 17 ár hjá CNN hefði ég haldið að einhver af stjórnendunum hefðu haft sómann til að segja sér fréttirnar beint,“ skrifaði Lemon í tilkynningu sem hann birti á Twitter.

Fjölmiðlar Bandaríkin
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið