Fleiri höfðu kvartað eftir fræðslu frá leiðbeinandanum

Bjarki Sigurðsson skrifar 1. apríl 2023 14:09

Skólabúðir Reykjaskóla í Hrútafirði. Búðirnar eru á vegum UMFÍ. Vísir/Vilhelm

Fleiri grunnskólar höfðu kvartað eftir kennslustund frá leiðbeinanda í Skólabúðunum á Reykjum. Starfsmenn frá grunnskólum sem heimsækja búðirnar þurfa ekki að vera í hverri einustu kennslustund með nemendum. Leiðbeinandinn hafði kennt börnum í skólanum hvernig þau ættu að vinna sér mein.

Fleiri skólar höfðu gert athugasemdir við kennslu frá leiðbeinanda í Skólabúðunum á Reykjum. Í gær var greint frá því hér á Vísi að börnum í búðunum hafi verið kennt hvernig þau ættu að vinna sér mein og lýsti leiðbeinandi þar fyrir þeim hvernig tilfinning fylgdi því að deyja.

Sú kennslustund fór fram í lok mars. Friðrik Arnarson, skólastjóri Dalvíkurskóla, staðfestir í samtali við fréttastofu að skólinn hafi einnig gert athugasemdir við fræðslur frá umræddum leiðbeinanda þegar nemendur frá skólanum voru þar í október á síðasta ári.

„Ég get ekki alveg sagt nákvæmlega hvað en við höfðum gert einhverjar athugasemdir. Meira er ekki um það að segja, það hefur farið í ferli og unnið hjá UMFÍ,“ segir Friðrik.

Friðrik segir að það sé ekki skylda á námskeiðum í skólabúðunum að fulltrúi frá grunnskólunum sé viðstaddur.

„Stundum þarf einhver að fylgja en það var ekki þannig í þetta skiptið,“ segir Friðrik.

Grunnskólar Skóla - og menntamál Börn og uppeldi Húnaþing vestra

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.