Innlent

„Þetta stefnir lífi fólks í hættu“

Máni Snær Þorláksson skrifar
Hér má sjá biluðu ljósastaurana sem um ræðir.
Hér má sjá biluðu ljósastaurana sem um ræðir. Vísir/Vilhelm

Íbúi í Kópavogi hefur miklar áhyggjur af langvarandi ljósleysi í nágrenni við heimilið sitt. Börn gangi um í svartamyrkri og tímaspursmál sé hvenær slys verður.

Ljósleysið má rekja til bilunar í jarðstreng samkvæmt tilkynningu frá Kópavogsbæ. Götuljós á hluta Álfhólsvegar, Bjarnhólastígs, Digranesheiðar, Hátraðar og Víghólastígs, eru því óvirk.

Anna Baldvina Jóhannsdóttir, sem býr á Álfhólsvegi í Kópavogi, segir í samtali við fréttastofu að henni blöskri ástandið. Ekki sé búið að vera ljós í staurunum síðan fyrir síðustu jól.

Kópavogsbær kennir þó tíðarfari og frosti í jörð um það hversu illa gengur að finna bilunina. Þörf sé á sérhæfðum mælitækjum til að staðsetja bilunina nákvæmlega svo hægt sé að lágmarka jarðrask.

„Það eru fjórir göngustígar yfir götuna og þeir eru allir óupplýstir,“ segir Anna Baldvina sem hefur áhyggjur af því að ljósleysið valdi slysi. Sérstaklega hefur hún áhyggjur af börnum í dökkum fatnaði án endurskinsmerkja.

Þá gefur Anna Baldvina ekki mikið fyrir svörin frá Kópavogsbæ. „Það er ansi seint um svör alltaf hjá Kópavogsbæ. Það er bara þannig,“ segir hún.

„En þetta er stórhættulegt og þetta stefnir lífi fólks í hættu.“

Umferðaröryggi Kópavogur Samgöngur
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið