Innlent

Sektaður á leiðinni til mömmu á 37 kílómetra hraða

Kolbeinn Tumi Daðason skrifar
Ólafur Páll ásamt Siggu Lund og Hvata þegar Bylgjulestin heimsótti Akranes sumarið 2022.
Ólafur Páll ásamt Siggu Lund og Hvata þegar Bylgjulestin heimsótti Akranes sumarið 2022. Vísir/Hulda Margrét

Ólafur Páll Gunnarsson útvarpsmaður á Rás 2 er hugsi eftir að hafa í annað sinn á einu ári verið sektaður fyrir að aka á 37 kílómetra hraða í heimabæ sínum Akranesi. Skiptar skoðanir er á því hvernig bregðast eigi við kappakstri á Seltjarnarnesinu á föstudagskvöld.

Ólafur Páll, sem stýrði sínum 1300. þætti af Rokklandi í gær, stingur niður penna í umræðum á Facebook. Tilefnið eru fréttir af ofsaakstri ökumanna á Seltjarnarnesi á föstudagskvöld þar sem telja má mikið happ að enginn slasaðist alvarlega.

Slökkvilið höfuðborgarsvæðisins birti þessa mynd af bílunum sem skullu saman á föstudagskvöld.

Tveir bílar lentu saman á Norðurströnd á Seltjarnarnesi laust eftir klukkan ellefu á föstudagskvöld. Annar ökumannanna hafði verið að taka fram úr bíl þegar hann lenti framan á hinum, sem kom úr gagnstæðri átt. Betur fór en á horfðist, enginn slasaðist alvarlega en fimm sem voru í bílunum voru fluttir á sjúkrahús.

Þór Sigurgeirsson bæjarstjóri á Seltjarnarnesi sagði í kvöldfréttum í gær að grípa þurfi til aðgerða til að sporna við hraðakstri á þessum kafla, ekki síst þar sem göngugötur liggja yfir veginn á nokkur hundruð metra millibili.

„Hraðamyndavélar og sektandi myndavélar hafa komið til tals. Nú er það á forræði lögreglunnar að raða slíku niður á höfuðborgarsvæðinu. Við munum kalla eftir að hér verði gripið til aðgerða,“ sagði Þór. Hann ætlaði strax í dag að óska eftir fundi með lögreglu vegna málsins.

Egill vill lækka hraða og bæta lýsingu

Egill Helgason sjónvarpsmaður segist aka þennan veg oft í viku á leiðinni út í Gróttu.

„Aksturslagið þar er algjörlega brjálæðislegt, mikið um kappakstur, hraðakstur og framúrakstur. Mátulegur hraði er 40 á þessum vegi,“ segir Egill.

Egill Helgason vill sjá lægri hámarkshraða á Norðurströnd. Lægri hraði á Hringbraut hafi verið góð breyting.Vísir/Vilhelm

„Hann er ekki vel upplýstur og þarna eru varasamar beygjur. Nú eða setja upp hraðahindranir. Mér finnst ástandið á gömlu Hringbrautinni milli Ánanausta og Háskólans hafa batnað ansi mikið eftir að hraðinn var lækkaður niður í 40.“

Vísar Egill til þess að hraðinn á Hringbrautinni var lækkaður eftir ákall íbúa í hverfinu.

Páll Magnússon, fyrrverandi þingmaður, segir algjöra rökleysu að lækka hraðann vegna þessa slyss.

„Halda menn að ökuþórarnir hefðu hætt við kappaksturinn ef hámarkshraðinn á þessari götu hefði verið lægri?! Það er þó allavega einhver snefill af rökhugsun í að hækka ökuleyfisaldurinn…“

Fimmtíu kílómetra hámarkshraði er á Norðurströnd en talið er að þeir sem urðu valdar að slysinu á föstudagskvöld hafi verið á nærri 100 kílómetra hraða. 

Yfirvöldum svona annt um okkur?

Ólafur Páll er meðal þeirra sem leggur orð í belg.

„Ég var sektaður fyrir of hraðan akstur í vikunni sem leið - í miðbænum á Akranesi á 37 km hraða,“ segir Ólafur Páll. Hámarkshraði í götunni er 30 kílómetrar á klukkustund. Hann segist einnig hafa lent í þessu fyrir ári þegar hann var á leið til mömmu sinnar í kaffi á 37 kílómetra hraða.

„Löggan situr fyrir annars löghlýðnum borgurunum á ómerktum bíl og flassar á lögbrjótana. Ég spurði lögreglumanninn sem flassaði á mig í vikunni hvers vegna þeir væru að þessu og hann sagði: Til þess að ná niður hraðanum. Ég er búinn að vera að hugsa um þetta síðan,“ segir Ólafur Páll.

Hraðakstur sé vissulega hættulegur og hraðinn drepi.

„En er yfirvöldum svona annt um okkur borgarana að þau sekta okkur fyrir að vera á 37 á leiðinni í kaffi til mömmu?“ spyr Ólafur Páll.


Tengdar fréttir

„Hrað­akstur er dauðans al­vara“

Betur fór en á horfðist þegar tveir bílar, sem komu úr gagnstæðri átt, lentu saman á Seltjarnarnesi. Sjónvarvottar telja að annar þeirra hafi verið á hátt í hundrað kílómetra hraða. Varðstjóri hjá umferðardeild lögreglunnar biðlar til fólks að aka varlega og eftir aðstæðum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×