Sanngjarnt væri að tvöfalda grunnlaun hjúkrunarfræðinga

Umræðan um laun, álag, vinnutíma, menntun og ekki síst starfsumhverfi hjúkrunarfræðinga hefur verið mikil í þjóðfélaginu að undanförnu. Í þættinum Ísland í dag fengu áhorfendur að heyra sögu Guðríðar Kristínar, sem kölluð er Gauja, og fá innsýn í daglegt starf hjúkrunarfræðinga.  

„Ég segist alltaf vera fædd og uppalin hér því ég byrjaði hér áður en ég fór í hjúkrunarfræðina. Ég var sjúkraliði fyrst eins og mamma,“ segir Gauja, sem starfar sem sérfræðingur á hjartadeild Landspítalans. 

„Ég held að ég sé á réttri hillu.“

Hún elskar starfið sitt og segir að vinnan sé alls konar.

Sanngjarnt að tvöfalda grunnlaun

„Grunnlaunin eru skammarlega lág, það er undir 500.000 á mánuði,“ segir Gauja þegar umræðan fer út í laun hjúkrunarfræðinga.

„Ég myndi alveg vilja tvöfalda þessa tölu, það finnst mér alveg sanngjarnt.“ 

segir Gauja og ítrekar að launin sem eru búin að vera í umræðunni séu heildarlaun með álagi, næturvöktum, helgarvöktum og svo framvegis. „Þetta er rosalega mikil ábyrgð og erfitt nám. Flott fagfólk og miklir fagmenn koma úr hjúkrunarnámi, sérstaklega á Íslandi.“

Hún telur ekki líklegt að þetta verði að veruleika á meðan núverandi fjármálaráðherra er við völd.

„Kannski getur maður bundið vonir við einhvern annan, ég veit það ekki.“

Aðspurð hvort hjúkrunarfræðingar í sömu stöðu og hún eigi að hafa sömu laun og læknar svarar Gauja,

„Já klárlega. Ég er sérfræðingur í hjúkrun og á að vera með sömu laun og sérfræðingur í læknisfræði.“

Ísland í dag innslagið má sjá í heild sinni í spilaranum hér fyrir neðan.