Sérfræðingar Europol töldu mennina við það að fremja hryðjuverk

Samúel Karl Ólason skrifar 15. desember 2022 19:07

Annar mannanna færður fyrir dómara í haust. Vísir/Vilhelm

Mennirnir sem ákærðir hafa verið fyrir að undirbúa hryðjuverk ræddu sín á milli að keyra trukk í gegnum gleðigönguna. Þeir töluðu einnig um að gera árásir á Alþingi, dómsmálaráðuneytið og lögregluna, auk þess sem þeir töluðu um að myrða nafngreinda einstaklinga.

Þetta er meðal þess sem kemur fram í úrskurði Landsréttar um að sleppa öðrum mannanna úr gæsluvarðhaldi en úrskurðurinn var birtur á vef Landsréttar í dag og honum fylgir gæsluvarðhaldsúrskurður Héraðsdóms Reykjavíkur frá 9. desember, þegar gæsluvarðhald mannanna var lengt.

Mönnunum tveimur var sleppt fyrr í vikunni og byggði Landsréttur þá ákvörðun á geðmati um að mennirnir væru ekki hættulegir.

Sjá einnig: Hvorki taldir hættulegir sér né öðrum og sleppt úr haldi

Í úrskurði Héraðsdóms Reykjavíkur kemur fram að lögreglan hafi leitað til sérfræðinga Europol í málefnum hryðjuverka og hryðjuverkasamtaka. Þeir voru fengnir til að fara yfir gögn málsins og mátu málið svo að mennirnir hafi verið við það að grípa til aðgerða og framkvæma hryðjuverk á Íslandi.

Með vopn og efni um hryðjuverkamenn og hryðjuverk

Hálfsjálfvirkir rifflar á borð við AK-47 og AR-15 voru gerðir upptækir, auk skotfæra og íhluta í þrívíddarprentaðar byssur þegar mennirnir voru handteknir í haust. Í dómsskjölum kemur fram að hald hafi verið lagt á hlut sem hægt væri að setja í AR-15 riffilinn og gera hann þannig sjálfvirkan. Þá fundu lögregluþjónar mikið magn skotfæra og hundrað skota magasín.

Þar kemur einnig fram að mennirnir höfðu í fórum sínum mikið magn efnis um þekkta hryðjuverkamenn, voðaverk þeirra, stefnur yfirlýsingar og verknaðar- og undirbúningsaðferðir þeirra.

Maðurinn sem úrskurðurinn fjallar um neitaði því að hafa undirbúið hryðjuverk og sagði ummæli þeirra um hin ýmsu voðaverk vera marklaus. Þau hefðu verið sett fram í gríni og undir áhrifum áfengis. Það sama ætti við um allt efnið sem þeir hefðu aflað sér.

Sjá einnig: Sagður hafa viljað lögreglubúning fyrir skotárás

Maðurinn er sagður hafa verið byrjaður að skrifa sitt eigið „manifesto“ eins og það er kallað á ensku en er nokkurs konar yfirlýsing sem birt er í tengslum við hryðjuverkaárás.

Grunaðir um skipulagningu hryðjuverka Lögreglumál Lögreglan

Tengdar fréttir

„Ákveðið viðbragð“ í gang eftir að mönnunum var sleppt

Embætti ríkislögreglustjóra hefur sett af stað „ákveðið viðbragð“ nú þegar mennirnir tveir, sem ákærðir eru fyrir undirbúning hryðjuverka, hafa verið látnir lausir samkvæmt úrskurði Landsréttar í gær.

14. desember 2022 15:00

Vill ekki að hótanir séu notaðar til að afvegaleiða umræðu um völd lögreglu

Helgi Hrafn Gunnarsson, fyrrverandi þingmaður Pírata, segir að ef hann yrði myrtur væri það síðasta sem hann myndi vilja að minning hans yrði notuð til að draga úr frelsi fólks og auka ofríki yfirvalda. Það fari gegn öllum hans hugsjónum vill hann ekki að hótanir í hans garð séu notaðar til að afvegaleiða umræðuna um lögreglu- og öryggismál hér á landi.

13. desember 2022 23:25

Árás ekki talin mjög líkleg eða yfirvofandi

Landsréttur segir að gögn máls mannanna tveggja, sem grunaðir eru um tilraun til hryðjuverka, bendi ekki til þess að árás væri yfirvofandi eða að minnsta kosti mjög líkleg. Ítarleg matsgerð dómkvadds manns virðist hafa haft mikil áhrif.

13. desember 2022 20:28

Segir ákæruna tilraun til að réttlæta frumhlaup lögreglunnar

Lögmaður annars þeirra sem hefur verið ákærður fyrir tilraun til hryðjuverka segir ákæruvaldið leggja líf tveggja ungra manna í rúst til að réttlæta frumhlaup lögreglunnar. Þetta er í fyrsta sinn í Íslandssögunni sem ákært er fyrir hryðjuverkabrot.

9. desember 2022 20:23

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir