Innlent

Ráð­herra láti eins og hann sé „hvítþveginn af glæp sem ríkis­stjórnin framdi“

Fanndís Birna Logadóttir skrifar
Andrés Ingi Jónsson, þingmaður Pírata, gagnrýnir Guðmund Inga Guðbrandsson, félags- og vinnumarkaðsráðherra, harðlega.
Andrés Ingi Jónsson, þingmaður Pírata, gagnrýnir Guðmund Inga Guðbrandsson, félags- og vinnumarkaðsráðherra, harðlega. Vísir/Samsett

Andrés Ingi Jónsson, þingmaður Pírata, vandaði félags- og vinnumarkaðsráðherra og öðrum stjórnarliðum ekki kveðjurnar á Alþingi í dag. Það væri stundum eins og fólk í stjórnarliðinu ætti erfitt með að skilja á milli veruleika og ímyndunar. Umdeilt útlendingafrumvarp dómsmálaráðherra verður ekki á dagskrá þingsins fyrir jól, sem Píratar fagna. 

Undir liðnum störf þingsins setti Andrés Ingi spurningarmerki við það að ráðherrann hafi fagnað því að Héraðsdómur hafi fyrr í vikunni dæmt brottvísun Hussein Hussein og fjölskyldu ólögmæta. Spurði þingmaðurinn hvort ráðherrann væri í aðstöðu til þess, ekki síst í ljósi þess að ráðherrann styðji við frumvarp dómsmálaráðherra um að ganga lengra.

„Á sínum tíma sagði hann auk þess ekkert sérstaklega athugavert við brottvísunina nema kannski að það hafi verið slæmt að það hafi ekki verið bíll frá ferðaþjónustu fatlaðra til að flytja Hussein úr landi,“ sagði Andrés en Hussein notast við hjólastól. „En nú gleðst hann yfir endurkomu þeirra eins og hann sé hvítþveginn af þessum glæp sem að ríkisstjórnin framdi.“

Þá vísaði hann til frétta í fjölmiðlum í gær þar sem fram kom að vísa ætti fleirum úr landi, þar á meðal átján ára stúlku. „Það er eins og Útlendingastofnun bíði með puttann á brottvísunartakkanum eftir því að börn nái átján ára aldri þannig það sé hægt að sparka þeim úr landi,“ sagði Andrés.

„Dómurinn sem sýnir að Hussein hafi verið órétti beittur, börnin sem kerfið iðar í skinninu að sparka úr landi þegar þau verða átján ára, skaðræðisfrumvarp Jóns Gunnarssonar, allt er þetta stefna stjórnvalda. Fólk getur ekki þvegið hendur sínar af þessu ef það er í stjórnarflokkunum,“ sagði hann enn fremur.

Fagna áfangasigri vegna frestun útlendingafrumvarps

Nú hefur komið í ljós að umdeilt útlendingafrumvarp dómsmálaráðherra hafi verið tekið af dagskrá þingsins fyrir jól. Þá verður málið tekið aftur fyrir í allsherjar- og menntamálanefnd eftir ármót.

„Píratar fagna þessum áfangasigri í baráttu sinni gegn mannfjandsamlegu frumvarpi ríkisstjórnar Katrínar Jakobsdóttur sem lagt er fram til höfuðs eins jaðarsettasta hóps fólks í íslensku samfélagi, fólks á flótta,“ segir í yfirlýsingu frá Pírötum vegna málsins.

Þau taka þó fram að fulltrúar meirihlutans standi áfram í vegi fyrir því að óháð álitsgerð verði fengin um lögmæti frumvarpsins, með tilliti til þess hvort það samræmist stjórnarskrá og öðrum alþjóðlegum skuldbindingum íslenska ríkisins um mannréttindi.

„Það er einlæg von Pírata að friðsælar stundir á jólahátíðinni geri stjórnarliðum kleift að endurskoða afstöðu sína gagnvart ólýðræðislegum og ógagnsæjum vinnubrögðum sínum í þessu máli,“ segir í yfirlýsingunni.


Tengdar fréttir

Tekist á um Jóla­daga­talið á Al­þingi

Skiptar skoðanir eru á Alþingi um útspil Útlendingastofnunar vegna Jóladagatals Ríkisútvarpsins. Þingmenn Miðflokksins eru hæstánægðir með upplýsingasíðu stofnunarinnar en þingmaður Pírata spurði hvort að eðlilegt gæti talist að starfsmaður stofnunarinnar hafi verið settur í þá vinnu að horfa á Jóladagatalið.

Mættu í skólann og völdu á­­­fanga sem ­­búa þær undir lækna­­nám

Hussein systurnar mættu í dag aftur í Fjölbrautaskólann við Ármúla til að velja áfanga fyrir næstu önn. Báðar völdu þær fög sem undirbúa þær undir læknis- og tannlæknisfræði en þær vilja starfa sem læknar hér á Íslandi í framtíðinni. Skólameistarinn segist himinlifandi með komu þeirra. 

Segir stjórnarliða tefja eingreiðslu til öryrkja

Umdeilt frumvarp dómsmálaráðherra um útlendinga var sett aftur á dagskrá þingsins í dag en tímasetning umræðunnar var harðlega gagnrýnd af stjórnarandstöðunni sem segir mikilvæg mál eins og eingreiðslu til öryrkja tefjast í kjölfarið.

Hundrað og sextán hafa verið fluttir eða sendir úr landi á árinu og 39 finnast ekki

Dómsmálaráðherra telur ekki ástæðu til að endurskoða brottflutning hælisleitenda til Grikklands, ólíkt félagsmálaráðherra Vinstri grænna, sem telur hollt að taka þá umræðu. Á þessari stundu stendur til að vísa 98 flóttamönnum úr landi sem hér eru, en af þeim finnast ekki 39. Hundrað og sextán hefur verið komið úr landi það sem af er ári.

Fimmta tilraun til breytinga á útlendingalögum hafin á Alþingi

Þingmenn tókust harkalega á um stöðu fólks sem sækir um alþjóðlega vernd á Íslandi á Alþingi í dag. Dómsmálaráðherra segir stefna í að fjörutíu sinnum fleiri sæki um vernd á þessu ári en fyrir tíu árum. Stjórnarandstöðuþingmenn sökuðu ráðherra um brot á ýmsum lögum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×