Jap­an­ir ætla í hern­að­ar­upp­bygg­ing­u

Ráðherrann segir þetta vegna sífellt versnandi öryggisástands á svæðinu. Mikil spenna er í Austur-Asíu og hefur hún aukist verulega á undanförnum árum. Er það að hluta til vegna vopnatilrauna og kjarnorkuvopnaþróunar í Norður-Kóreu.

Þar að auki hefur spennan aukist í tengslum við Kína og tilkalls Kínverja til bæði alls Suður-Kínahafs og Taívans. Kínverjar hafa þar að auki staðið í mikilli hernaðaruppbyggingu og nútímavæðingu á undanförnum árum.

Sjá einnig: Japan og Bandaríkin taka höndum saman gegn Kína

Japanir hafa heitið því að koma Taívan til aðstoðar, geri Kínverjar innrás í ríkið.

Samkvæmt frétt Japan Times hafa yfirvöld í Japan lengi haldið sig við að verja um einu prósenti af GDP til varnarmála en með þessu á að færa ríkið nær þeim staðli sem miðað er við innan Atlantshafsbandalagsins, þó flest ríki bandalagsins nái því ekki.

Fjárhagsstaða Japans þykir ekki góð um þessar mundir en samkvæmt JT hafa ráðgjafar Kishida lagt til niðurskurð og skattlagningu til að fjármagna fjárútlátin.

Hröð fólksfækkun grefur undan öryggi

Japan í þriðja sæti heimsins yfir stærstu hagkerfin en framfærslukostnaður er mikill og launahækkanir hafa ekki haldið í við hækkun kostnaðar. Það er talið meðal ástæðna fyrir því að íbúafjöldi hefur dregist saman á Japan og þjóðin hefur elst mjög.

Íbúafjöldi Japans stendur í rúmum 125 milljónum og hefur hann dregist saman í um fjórtán ár. Spár gera ráð fyrir að fólksfækkunin muni halda áfram til ársins 2060 þá verði Japanir alls 86,7 milljónir talsins.

Samkvæmt AP fréttaveitunni hafa aldrei fæðst færri börn í Japan en á þessu ári. Alls fæddust 599.636 börn frá janúar til september og er það 4,9 prósentum minna en á sama tímabili í fyrra. Allt síðasta ár fæddust 811.000 börn í Japan og er útlit fyrir að færri börn fæðist á þessu ári.

Ungt fólk er sagt forðast það að eignast börn og stofna fjölskyldur vegna erfiðs ástands á vinnumarkaði, erfiðra samgangna og menningar sem hæfist ekki því að báðir foreldrar í fjölskyldu séu útivinnandi.

Nefnd sendi í síðustu viku frá sér skýrslu um að þessi samdráttur gæti dregið úr þjóðaröryggi Japans á komandi árum.

Vilja geta gert árásir

Frá endalokum seinni heimsstyrjaldarinnar hefur stjórnarskrá Japans meinað herafla ríkisins að starfa utan landamæra þess en japanskir ráðamenn hafa á undanförnum árum lagt til að Japanir auki getu sína til árása. Flokkur Kishida hefur lagt til að Japanir komi upp getu til að gera árásir á stjórnstöðvar og herstöðvar mögulegra óvina ef slíkir gerðu árás á Japan.

Sjá einnig: Ástralar og Japanir skrifa undir varnarsáttmála

Stuðningsmenn þessarar áætlunar segja að hún myndi gera Japönum kleift að standa frekar í hárinu á Kínverjum og Norður-Kóreumönnum. JT segir nýlega könnun benda til þess að rúmlega sextíu prósent Japana séu fylgjandi því.

Kishida gaf í skyn á þingi í morgun að til stæði að byggja upp loftvarnir Japans og byggja upp getu til árása, eins og til dæmis með stýriflaugum, og að það myndi senda þeim sem ógni Japan skýr skilaboð.