Handbolti

Leipzig sýndi Patreki áhuga sem segir kitla að þjálfa í Þýskalandi

Smári Jökull Jónsson skrifar
Patrekur segir kitla að þjálfa í þýsku úrvalsdeildinni.
Patrekur segir kitla að þjálfa í þýsku úrvalsdeildinni. Vísir/Hulda Margrét

Patrekur Jóhannesson þjálfari Stjörnunnar var í viðtali í nýjasta þætti hlaðvarpsins Handkastið sem fjallar um Olís-deildina í handknattleik. Þar kom fram að Leipzig hefði kannað stöðuna hjá honum áður en Rúnar Sigtryggsson var ráðinn.

Patrekur hefur verið þjálfari Stjörnunnar síðan árið 2020 en hann gerði Selfoss að Íslandsmeisturum árið 2019. 

Arnar Daði Arnarsson, umsjónarmaður Handkastsins, spurði Patrek að því hvort rétt væri að Leipzig í þýsku úrvalsdeildinni hafi boðið honum þjálfarastarfið nú á dögunum. Rúnar Sigtryggsson var ráðinn þjálfari liðsins í byrjun mánaðarins.

„Nje, boðið og ekki boðið. Ég heyrði bara í gegnum umboðsmann og þeir hleruðu mig og svo varð ekkert meira úr því,“ sagði Patrekur en Leipzig hefur unnið þrjá leiki í röð í þýsku deildinni síðan Rúnar tók við liðinu.

Patrekur var ráðinn þjálfari Skjern haustið 2019 en hætti með liðið nokkrum mánuðum síðar eftir fremur slæmt gengi liðsins. Hann segir kitla að þjálfa í efstu deild í Þýskalandi.

„Ég er bara ánægður og börnin eru ánægð á Íslandi. Ég fór þarna til Skjern og það var alltaf planið að fjölskyldan kæmi en síðan var það ekki alveg að gera sig. Eins góður klúbbur og Skjern er þá var það bara ekki staðurinn fyrir fjölskylduna að flytja. Ég lét það bara svolítið á hold.“

„Ég fæ öðru hvoru fyrirspurnir. Þýskaland, jú jú. En eins og staðan er í dag þá er ég ekkert að stökkva frá Stjörnunni. Mér líður vel eins og staðan er í dag en maður veit aldrei hvað gerist seinna. Auðvitað kitlar að þjálfa í Bundesligunni. Ég er ungur, ég er bara fimmtugur. Það er nægur tími,“ sagði Patrekur.

Gengi Stjörnunnar í vetur hefur verið upp og ofan en liðið beið nú síðast lægri hlut gegn Val á föstudaginn. 

„Eins og staðan er í dag líður mér rosalega vel í Garðabænum og er bara brattur þrátt fyrir að gengi liðsins sé upp og niður. Ég hef trú á því að við verðum góðir þegar úrslitakeppnin byrjar.“

Hægt er að hlusta á nýjasta þátt Handkastsins í spilaranum hér fyrir neðan.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.