Stelpurnar fá að spila á stóru leikvöngum strákanna um helgina

Óskar Ófeigur Jónsson skrifar 18. nóvember 2022 16:01

María Þórisdóttir mætir með Manchester United liðinu á Emirates leikvanginn um helgina en hér er hún á leik á móti Arsenal í febrúar síðastliðnum. Getty/Charlotte Wilson

Enska úrvalsdeildin hjá körlunum er komið í HM-frí þar til fram yfir jól en mörg ensku félaganna ætla að leyfa kvennaliðum sínum að spila á stóru leikvöngunum um helgina.

Þrír leikir fara fram á stórum leikvöngum í úrvalsdeild kvenna á laugardag og sunnudag. Þessir leikvangar eru vanalega aðeins notaðir af karlaliðum félaganna en það fer vonandi að breytast með mun meiri áhuga og betri mætingu á kvennaleikina.

Arsenal og Manchester United mætast á Emirates leikvanginum á morgun, laugardag, og verður leikurinn sýndur beint á Sky Sports.

Emirates tekur yfir sextíu þúsund manns í sæti en kvennalið Arsenal spilar heimaleiki sína vanalega á leikvangi Borehamwood Football Club, Meadow Park, sem tekur 4500 manns þar af 1700 í sæti.

Chelsea og Tottenham mætast á Stamford Bridge leikvanginum á sunnudaginn og verður leikurinn sýndur beint á BBC 1.

Stamford Bridge tekur yfir fjörutíu og eitt þúsund manns í sæti en kvennalið Chelsea spilar heimaleiki sína vanalega á Kingsmeadow vellinum sem tekur 4850 manns þar af 2265 manns í sæti.

Aston Villa og Reading mætast á Villa Park á sunnudaginn. Villa Park tekur yfir fjörutíu og tvö þúsund manns í sæti en kvennalið Aston Villa spilar heimaleiki sína vanalega á Bescot Stadium sem tekur yfir ellefu þúsund manns.