Innlent

Áhugavert fyrsta rekstrarár eftir að hafa opnað hótel í upphafi faraldurs

Kristján Már Unnarsson skrifar
Ólöf Ýrr Atladóttir er fyrrverandi ferðamálastjóri og eigandi sveitahótelsins Sóta Summits í Fljótum.
Ólöf Ýrr Atladóttir er fyrrverandi ferðamálastjóri og eigandi sveitahótelsins Sóta Summits í Fljótum. Sigurjón Ólason

Hún var ferðamálastjóri í áratug áður en hún keypti aflagðan sveitaskóla nyrst í Skagafirði og breytti í hótel með ærnum kostnaði. Sama dag og Ólöf Ýrr Atladóttir og maður hennar opnuðu var hins vegar öllu skellt í lás vegna covid.

Í fréttum Stöðvar 2 voru Fljótin í Skagafirði heimsótt. Frá því nýr skóli reis að Sólgörðum árið 1985 hafði gamla skólahúsið drabbast niður allt þar til Ólöf Ýrr og eiginmaður hennar, Arnar Þór Árnason, hófu að gera það upp árið 2017, eins og Ólöf lýsti þegar við hittum hana á staðnum í byrjun septembermánaðar.

Frá Sólgörðum í Fljótum. Þegar nýi skólinn til vinstri var tekinn í notkun árið 1985 var hætt að nota gamla skólann til hægri. Jarðhiti er á staðnum og þar er sundlaug sveitarinnar, Barðslaug.Sigurjón Ólason

„Það þurfti talsvert mikið að gera. Það þurfti að klæða það að utan, skipta út öllum gluggum, setja nýtt þak og gera allar innréttingar og allt. Og lukum því og opnuðum hér 13. mars 2020 sem, eins og ég hef sagt, var líklega besti dagur mannkynssögunnar til að opna hótel,“ segir Ólöf og hlær.

Já, það var sama dag og ríkisstjórnin tilkynnti um víðtækt samkomubann vegna covid-faraldurs. Þau ákváðu að þrauka með tilbúið gistirými fyrir fimmtán manns í hóteli sem kennt er við Sótahnjúk, strýtulagað fjall sem blasir við frá Sólgörðum.

Hótelið er nefnt eftir Sótahnjúki, strýtulagaða fjallinu til vinstri. Fjallið er sagt kennt við Sóta, leysingja Hrafna-Flóka, sem nam Flókadal, en dalurinn sést til hægri.Sigurjón Ólason

„Eins og þú manst, þá var alltaf.. „þetta verður nú búið í næsta mánuði“ - maður er svona eiginlega leiddur áfram og er kominn með allskonar skuldbindingar sem maður getur ekki hætt við. Þannig að þetta var mjög áhugavert fyrsta rekstrarár, getum við sagt.

En það kannski góða í því var að það neyddi mann svolítið til þess að hugsa út fyrir það sem við höfðum kannski hugsað okkur fyrst,“ segir Ólöf Ýrr.

Þau fengu sér ferðaskrifstofuleyfi og ákváðu að höfða til íslenskra hópa með pakkaferðum um náttúru Fljótanna, jafnt sumar sem vetur; buðu upp á gönguferðir, kajakferðir, hjólaferðir og gönguskíðaferðir.

„Og svo þar að auki þá er auðvitað fjallaskíðamennskan, sem er að koma sterk inn.“

Gamla skólahúsið var upphaflega byggt á stríðsárunum sem skjól fyrir siglfirsk börn þegar hætta var talin á loftárásum þýskra flugvéla á Siglufjörð.Sigurjón Ólason

Sundlaugina við hliðina nýta þau í fljótandi djúpslökun fyrir gestina. Þegar við spyrjum hvort það séu ekki aðallega konur sem stundi slíkt svarar Ólöf því ákveðið neitandi. Karlarnir komi líka í flotið.

„Þeir einmitt flissa og skríkja þarna fyrst. Eru voða meðvitaðir. Svo þegar þeir byrja að fljóta þá bara fljóta þeir. Þeir bara sofna og þeir slaka allir og maður þarf bara að hala þá inn þarna eftirá oft. Þarna náið þið loksins að teygja úr ykkur svona almennilega,“ segir eigandi Sóta Summits og fyrrverandi ferðamálastjóri.

Ítarlegri umfjöllun er í þættinum Um land allt, sem nálgast má á streymisveitunni Stöð 2+.

Hér má sjá frétt Stöðvar 2:


Tengdar fréttir

Haganesvík langt frá því að vera eitthvert Disneyland

Líf hefur færst á ný í eyðiþorpið Haganesvík í Fljótum. Bandaríska lúxushótelið að Deplum breytti gömlu verslunarhúsi í hljóðupptökuver og gömlu sláturhúsi í íþróttasal - allt fyrir efnaða ferðamenn til að stytta sér stundir.

Rækta eitt óvenjulegasta afbrigði íslenska hestsins

Litförótt heitir eitt óvenjulegasta litaafbrigði íslenska hestsins en í því felst að hesturinn skiptir litum fjórum sinnum á ári. Litaafbrigðið var talið í hættu á að deyja út þegar hrossabændur hófu að reyna að bjarga því.

Stíflan sem sökkti heilum dal og eyddi sjö bæjum telst afturkræf

Heilum dal var sökkt og sjö sveitabæir fóru í eyði með Skeiðsfossvirkjun sem reist var til að rafvæða Siglufjörð. Stöðvarstjórinn, sem brátt lætur af störfum eftir yfir fjörutíu ára starf við virkjunina, segir að svona yrði örugglega ekki gert í dag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.