Fyrsta íslenska atvinnukonan í hjólreiðum: „Vitiði hvað ég er gömul?“

Draumurinn rættist um fertugt

María Ögn er flestum innan hjólreiðaheimsins á íslandi vel kunnug en hún var meðal annars fyrsta konan til að keppa fyrir Íslands hönd í erlendri hjólreiðakeppni. María er menntuð sem sálfræðingur og íþróttakennari og hefur átt stóran þátt í þessari hjólreiðabylgju sem hefur verið á Íslandi síðustu ár. 

Hún segir hjólreiðaæðið eins og sumir kalli það þó ekki vera tískubylgju, heldur lífsstíl sem  vonandi sé kominn til að vera. 

Í gegnum hjólaferil sinn hefur hún unnið fjölda Íslandsmeistaratitla ásamt því að þjálfa hóp hjólreiðafólks, hérlendis og erlendis og stjórnað stórum hjólreiðakeppnum. 

Ég er mikill dagdreymari. Mig er búið að dreyma um þetta, eitthvað hliðstætt þessu og svo bara gerist það,

segir María um þennan merka áfanga að verða fyrsta íslenska atvinnukonan í hjólreiðum. 

Í dag er hún á samningi hjá fyrirtæki sem heitir Café du Cycliste, frönsku hjólafatamerki sem hafði upphaflega samband við Maríu vegna samstarfs fyrir tveimur árum síðan. 

Viðtalið við Maríu Ögn í heild sinni er hægt að nálgast í spilaranum hér fyrir neðan. 

Setið fyrir á fjallstoppum í evrópu

„Þau fundu mig í gegnum Instagram. Ég byrjaði þá að módelast fyrir þau fyrir rúmum tveimur árum og er búin að ferðast með þeim fyrir það „concept“ í smá tíma.“

Merkið er vel þekkt innan hjólareiðaheimsins og segir María mikinn heiður og mikið ævintýri að fá að sitja fyrir á myndum og vera eitt af andlitum merkisins. 

 „Ég er búin að vera á toppum að skipta um föt á rassinum á alls konar fjöllum í evrópu,“ segir María og hlær. Þannig að það er búið að vera mjög gaman.“

Örlagaríka annað sætið

Í október árið 2021 rættist svo stóri draumur Maríu um atvinnumennsku þegar Café du Cycliste buðu henni að koma út til Frakklands og taka þátti í stórri malarhjólreiða keppni eða gravel keppni eins og það kallast. Þar hampaði hún öðru sæti og út frá því var ákveðið að setja saman stelpu hjólalið sem keppir í malarhjólreiðum fyrir hönd fyrirtækisins. 

María er eins og áður sagði 42 ára og segist hafa orðið örlítið uppi með sér þegar henni var boðið að vera með í hjólaliðinu. 

Ég roðnaði bara og sagði: Vitiði hvað ég er gömul?

Í þessum tilteknu keppnum, gravel, eru vegalengdirnar allt frá 140 - 340 kílómetrar þar sem hjólað er á malarvegum og geta keppnirnar því staðið yfir í allt að átta klukkustundir. 

Hér fyrir neðan er hægt að sjá kynningarmyndband um Maríu sem sem Café du Cycliste framleiddi en myndbandið er tekið upp á Íslandi. 

Þarf stundum að klípa sig

Í júlí á þessu ári ákvað María að hætta í dagvinnunni sinni þar sem atvinnumennskan bauð ekki upp á það lengur. Hún segir hjólaæfingarnar sjálfar geta verið allt frá tíu til tuttugu klukkustundir á viku eða að meðaltali um þrjár klukkustundir á dag. 

María segir spennandi tíma framundan þó svo að formlegu keppnistímabili sé nú lokið en undirbúningur fyrir næsta tímabil sé hafinn af fullum krafti. 

Hún segist stundum þurfa að klípa sig þegar hún hugsi um það að hún sé nú að lifa drauminn. Það sýni henni þó að allt sé mögulegt ef viljinn og eldmóðurinn sé til staðar. 

Einhvers staðar er maður að leggja inn einhverja punkta, þannig að draumarnir bara rætast!

Morgunþættirnir Bakaríið eru á dagskrá alla laugardaga frá 9 - 12 á Bylgjunni. Hægt er að nálgast síðasta þátt (15. október) í heild sinni í spilaranum hér fyrir neðan.