Innlent

Komu ökumanni sem sat fastur í Krossá til bjargar

Fanndís Birna Logadóttir skrifar
Útkallið barst á tíunda tímanum í morgun. 
Útkallið barst á tíunda tímanum í morgun.  Mynd/Aðsend

Skálaverðir og björgunarsveitarmenn komu ökumanni til bjargar í morgun þegar bíll hans festist í Krossá í Þórsmörk. Þyrla Landhelgisgæslunnar var í æfingarflugi á svæðinu en ekki reyndist þörf á aðstoð þeirra. 

Karen Ósk Lárusdóttir, verkefnastjóri aðgerðarmála hjá Landsbjörg, segir útkallið hafa borist á tíunda tímanum í morgun. Skálavörður úr Húsadal var fyrstur á vettvang og aðstoðaði manninn í land. 

„Það fóru níu manns í þetta verkefni og einstaklingurinn komst út úr bílnum. Björgunarsveitir reyndu að ná bílnum en það gekk eitthvað brösulega en hann komst svo í land bara stuttu seinna,“ segir Karen en bílstjórinn var heill á húfi og útkallið ekki talið alvarlegt.

Maðurinn komst út en bíllinn sat fastur. Mynd/Aðsend

Á sama tíma var þyrla Landhelgisgæslunnar í æfingarflugi í Þórsmök og hélt á staðinn þegar útkallið barst.

„Þegar að þyrlan var þarna á svæðinu þá var maðurinn kominn út úr bílnum og kominn í land og var þar í góðum höndum þannig að þyrlan lenti bara á staðnum og þurfti ekkert að grípa inn í,“ segir Ásgeir Erlendsson, upplýsingafulltrúi Landhelgisgæslunnar.

Karen bendir á að þetta sé alvanalegt útkall þar sem bílar festast reglulega í ám í Þórsmörk.

„Skálaverðirnir í Langadal eru ótrúlega snöggir af stað, þeir eru með góða dráttarvél frá Ferðafélaginu og eru ótrúlega snöggir að bregðast við og mjög klárir að ná í bíla upp úr ánni í samstarfi við björgunarsveitina,“ segir Karen.

Bíllinn var dreginn upp úr ánni. Mynd/Aðsend

Fréttin hefur verið uppfærð. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.