Lyman sýni að innlimunin sé farsi

„Úkraínski fáninn flýgur yfir Lyman,“ sagði Selenskí í ávarpi seint í gærkvöldi. Hann bætti við að á undanfarinni viku hefðu úkraínskum fánum fjölgað á Donbas-svæðinu og eftir viku yrðu þeir enn fleiri.

„Fáni okkar verður alls staðar,“ sagði Selenskí.

Ráðgjafi Selenskís segir Rússa hafa misst um 1.500 hermenn í Lyman. Þær tölur hafa þó ekki verið staðfestar og þar að auki liggja engar upplýsingar fyrir um mannfall meðal Úkraínumanna. Selenskí sjálfur birti stutt myndband klukkan tíu í morgun að íslenskum tíma, þar sem hann sagði Úkraínumenn hafa náð fullri stjórn á Lyman.

Hingað til hefur verið óljóst hvort margir rússneskir hermenn hafi verið skildir eftir í borginni þegar rússneski herinn hörfðaði þaðan.

Sjá einnig: Lyman er í höndum Úkraínumanna

Vladimír Pútín, forseti Rússlands, lýsti formlega yfir ólöglegri innlimun fjögurra héraða Úkraínu á föstudaginn. Það gerði hann í kjölfar atkvæðagreiðslu sem haldin var í snatri eftir að Rússar voru reknir frá Kharkív-héraði í síðasta mánuði.

Ráðamenn í Rússlandi og leppstjórar þeirra á hernumdum svæðum í Úkraínu segja nánast alla íbúa hafa valið innlimun í Rússland.

Sjá einnig: Kadyrov kallar eftir herlögum og notkun kjarnorkuvopna

Í ávarpi sínu í gær sagði Selenskí að þessi atkvæðagreiðsla hefði verið sjónarspil Í fyrsta lagi hefðu flestir íbúar svæðisins flúið undan hersveitum Rússlands og margir af þeim sem urðu eftir greiddu atkvæði undir eftirliti rússneskra embættismanna og vopnaðra hermanna.

Sagðir hafa náð árangri í Kherson

Fregnir hafa borist af því að Úkraínumönnum hafi einnig vegnað vel í Kherson-héraði í suðurhluta landsins á undanförnum dögum og sérstaklega í nótt. 

Úkraínumenn hófu umfangsmikla gagnárás gegn Rússum í héraðinu í sumar en í aðdraganda hennar eru Rússar sagðir hafa flutt margar af sínum reyndustu og bestu hersveitum á svæðið norður af Dniproá. Sókn Úkraínumanna þar er sögð hafa verið verulega kostnaðarsöm og víglínurnar hafa oft lítið hreyfst yfir löng tímabil.

Þá hafa Úkraínumenn reynt að einangra rússneska hermenn á norðubakka Dnipro með HIMARS-flugskeytakerfum og annarskonar árásum á skotfærageymslur og brýr yfir Dniproá.

Nú hafa borist fregnir af því að Úkraínumönnum hafi tekist að brjóta sér leið í gegnum varnir Rússa

Á meðfylgjandi korti frá hugveitunni Institute for the study of war má sjá grófa mynd af því hvernig staðan var í gær. Úkraínumenn eru sagðir hafa brotið sér leið í gegnum varnir Rússa í austurhluta Kherson og munu þeir hafa sótt til suðurs með Dniproá og frelsað nokkrar byggðir þar.