Handbolti

Olís-spá kvenna 2022-23: Áskriftinni sagt upp

Ingvi Þór Sæmundsson skrifar
HK hefur spilað samfleytt í efstu deild síðan 2005.
HK hefur spilað samfleytt í efstu deild síðan 2005. vísir/hulda margrét

Íþróttadeild Vísis og Stöðvar 2 Sports spáir HK 8. sæti Olís-deildar kvenna í vetur.

Íþróttadeild Vísis og Stöðvar 2 Sports spáir fyrir um gengi liðanna í Olís-deild kvenna en keppni í deildinni hefst fimmtudaginn 15. september.

Íþróttadeild spáir HK 8. sæti Olís-deildar kvenna í vetur og að liðið falli niður í Grill 66-deildina eftir átján tímabil í röð í deild þeirra bestu.

HK lenti í 4. sæti Covid-tímabilið 2019-20 en hefur endað í 7. sæti undanfarin tvö ár og því þurft að fara í umspil til að sæti sínu í Olís-deildinni.

Annað árið í röð hefur leikmannahópur HK veikst umtalsvert. Markadrottning Olís-deildarinnar á síðasta tímabili, Jóhanna Margrét Sigurðardóttir, er farinn í atvinnumennsku, fyrirliðinn Sigríður Hauksdóttir, sem lék reyndar ekkert á síðasta tímabili, gekk í raðir Vals og einn besti varnarmaður liðsins, Alexandra Líf Arnarsdóttir, fór til Noregs.

HK átti fjóra leikmenn í U-18 ára landsliðinu sem endaði í 8. sæti á HM í sumar. Þessir leikmenn, Ethel Gyða Bjarnasen, Embla Steinþórsdóttir, Inga Lára og Alfa Brá Oddsdóttir Hagalín, spiluðu aðallega með U-liði HK á síðasta tímabili en fá væntanlega nokkuð stórt hlutverk með aðalliðinu í vetur. Og þær þurfa að standa sig því HK hefur ekki fengið einn einasta leikmann fyrir tímabilið. Þá er nýr maður í brúnni hjá HK, Samúel Ívar Árnason.

Miðað við blóðtökuna sem HK hefur orðið fyrir væri liðið eflaust fegið að halda áfram áskrift að 7. sætinu sínu. Það er þó hætt við að áskriftinni verði sagt upp.

Gengi HK undanfarinn áratug

  • 2021-22: 7. sæti
  • 2020-21: 7. sæti
  • 2019-20: 4. sæti
  • 2018-19: 7. sæti
  • 2017-18: B-deild (2. sæti)
  • 2016-17: B-deild (4. sæti)
  • 2015-16: 9. sæti
  • 2014-15: 9. sæti
  • 2013-14: 8. sæti+átta liða úrslit
  • 2012-13: 5. sæti+átta liða úrslit

Lykilmaðurinn

Valgerður Ýr Þorsteinsdóttir er af miklum íþróttaættum.vísir/hulda margrét

Valgerður Ýr Þorsteinsdóttir er reyndasti leikmaður HK og það reynir á hana sem aldrei fyrr í vetur. Hún býr yfir miklum leiðtogahæfileikum og þeir verða að skína skært í ungu liði HK. Félagið hefur verið í efstu deild frá 2005 og Valgerður vill eflaust ekki sjá það fara niður á sinni vakt.

Félagaskiptamarkaðurinn

Komnar:

Farnar:

  • Jóhanna Margrét Sigurðardóttir til Önnereds (Svíþjóð)
  • Sigríður Hauksdóttir til Vals
  • Guðrún Erla Bjarnadóttir til Fjölnis/Fylkis
  • Þóra María Sigurjónsdóttir til Gróttu
  • Alexandra Líf Arnarsdóttir til Fredrikstad (Noregi)

Markaðseinkunn (A-C): C

Fylgist með

Fáir nema allra, allra hörðustu handboltaáhugamenn þekktu Ethel Gyðu Bjarnasen í byrjun sumars. En það breyttist þegar EM U-18 ára hófst. Ethel átti þar hvern stórleikinn á fætur öðrum og var meðal bestu markvarða mótsins. Hún var sérstaklega nösk að verja úr dauðafærum og nánast ósigrandi í vítaköstum. Ethel spilaði sama og ekkert með aðalliði HK á síðasta tímabili en það ætti að breytast í vetur.




Fleiri fréttir

Sjá meira


×