Arteta segir að dómarinn hafi viðurkennt að brotið hafi verið lítið

Martinelli kom Arsenal yfir eftir skyndisókn í fyrri hálfleik. Markið var hins vegar dæmt af eftir að það hafði verið skoðað á myndbandi því Martin Ödegaard þótti hafa brotið á Christian Eriksen. Bæði Ödegaard og Arteta lýstu yfir óánægju sinni með ákvörðunina eftir leikinn.

„Að mínu mati var þetta aldrei brot. Þetta var lítil snerting og til að VAR komi að borðinu þarf þetta að vera augljóst. Þetta var mjög, mjög lítið. Þetta lítur eflaust verr út á myndbandi en þetta var aldrei brot og dómarinn lét leikinn halda áfram,“ sagði Ödegaard.

Að sögn Artetas viðurkenndi Tierney að það ákvörðunin að dæma markið af hafi orkað tvímælis.

„Dómarinn sagði að þetta hafi verið ströng ákvörðun. Eina sem við biðjum um er samræmi. Í dag [í gær] var aftur dæmt mark af okkur en því miður er ekkert sem við getum gert í því núna,“ sagði Arteta.

Tapið í gær var það fyrsta hjá Arsenal á tímabilinu. Liðið er samt enn á toppi ensku úrvalsdeildarinnar með fimmtán stig.