Erlent

Yfirvöld nota gervigreind til að finna faldar sundlaugar

Hólmfríður Gísladóttir skrifar
Faldar sundlaugar hafa reynst óvæntur tekjustofn fyrir skattayfirvöld.
Faldar sundlaugar hafa reynst óvæntur tekjustofn fyrir skattayfirvöld.

Yfirvöld í Frakklandi hafa notað gervigreind til að leita að sundlaugum í níu héruðum, sem íbúar hafa ekki gefið upp. Fleiri en 20 þúsund sundlaugar hafa fundist til þessa og fært skattayfirvöldum jafnvirði 1,4 milljarða króna í tekjur.

Frökkum ber að tilkynna sundlaugar til yfirvalda, þar sem þær auka virði eigna og eiga þannig að leiða til hækkunar á fasteignaskatti. Fólk virðist hins vegar misduglegt að sinna tilkynningaskyldunni.

Til að bregðast við þessu notuðu yfirvöld hugbúnað þróaðan af Google og franska ráðgjafarfyrirtækinu Capgemini, sem leitaði að sundlaugum á gervihnattamyndum af níu héruðum í október 2021.

Nú segja skattayfirvöld að það standi til að nota hugbúnaðinn á landsvísu og þá er í skoðun að nota hann einnig til að finna aðrar framkvæmdir á borð við viðbyggingar, garða og garðskála, sem einnig spila inn í útreikning fasteignaskatta.

Fyrst þarf þó að tryggja að hugbúnaðurinn flaggi ekki aðrar „byggingar“ á borð við barna- eða hundakofa.

Árið 2020 voru 3,2 milljónir einkasundlaugar skráðar í Frakklandi. Tvísýnt er um fjölgun þeirra en það er í umræðunni að banna byggingu nýrra sundlauga, vegna mikils vatnsskorts.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.