Brynjar segir umdeildan fund með Namibíu­mönnum hinn furðu­legasta

Fréttablaðið greindi frá því í morgun að talsmaður namibíska utanríkissamskipta- og samvinnuráðuneytinu vilji ekki skrifa undir skýringar Brynjars Níelssonar, aðstoðarmanns dómsmálaráðherra á fundi sem hann átti með namibískum embættismönnum. Þann 7. júní síðastliðinn hitti Brynjar aðstoðarforsætisráðherra Namibíu, ríkissaksóknara Namibíu og aðstoðarframkvæmdastjóra namibísku spillingarnefndarinnar þá sem fulltrúi Jóns Gunnarssonar dómsmálaráðherra.

Sakar ríkisstjórnina um fúsk

Brynjar hefur ekki viljað upplýsa um efni fundarins og í morgun fordæmdi Helga Vala Helgadóttir, þingmaður Samfylkingar það og svör Brynjars á Facebook-síðu sinni:

„Þetta er auðvitað ævintýraleg della. Aðstoðarmaður dómsmálaráðherra fundar ekki með aðstoðarforsætisráðherra Namibíu, ríkissaksóknara Namibíu og aðstoðarframkvæmdastjóra namibísku spillingarnefndarinnar fyrir hönd Jóns Gunnarssonar dómsmálaráðherra í einkaerindum. Ekki frekar en forsætisráðherra sem fundaði með þeim fyrst eða utanríkisráðherra. Gætum við fengið ögn af fagmennsku takk?“ spyr Helga Vala.

Þegar Vísir bar þetta undir Brynjar nú í morgun spurði hann á móti hvort þetta væru ekki bara þingmenn Samfylkingarinnar að reyna að þyrla upp moldviðri út af engu?

Heimsóttu helstu ferðamannastaði og bönkuðu uppá

En hvernig var þetta eiginlega með þennan fund sem tvennum sögum fer af? Brynjar segir ekki svo gott að átta sig á því.

„Þetta ágæta fólk frá Namibíu hafði verið hér á landi í einhverja daga og heimsótt helstu ferðamannastaði án þess að nokkur vissi þegar það bankaði upp á hjá forsætisráðherra og vildi eiga við hann orð varðandi Samherjamálið. Hún benti á að dómsmálaráðherra væri sá sem betra væri að tala við,“ segir Brynjar spurður um hvernig það hafi komið til að hann hafi verið í forsvari.

„Óskað var eftir fundi við dómsmálaráðherra sem ekki var viðlátinn. Var þeim þá gefinn kostur á að ræða við hinn viðkunnalega aðstoðarmann ráðherra, sem þau þáðu,“ segir Brynjar.

Furðulegur fundur

Með honum á fundinum voru embættismenn til að geta svara spurningum sem upp kæmu.

„Svona var aðdragandinn að þessum fundi en það sem kom fram á fundinum er síðan efni í uppistand. 

Ég sagði ekki að ég hafi fundað með þessu fólki í einkaerindum heldur sagði að mig minnir að þetta fólk hafi ekki verið hér á landi í embættiserindum enda bara bankað upp á sísvona og enginn vissi af þeim.

Voru þetta þá bara einhverjir villuráfandi sauðir?

„Skal ekki segja en þetta var mjög furðuleg framkvæmd. Það er eiginlega ómögulegt fyrir mig að segja hvort þetta fólk var í einkaerindum eða embættiserindum. Það væri kannski best að spyrja það sjálft.“

Þessi umræddi fundur hefur verið umdeildur og var hart tekist á um hann á Facebook-síðu Brynjars fyrir nokkru en þar sóttu meðal annarra Helga Vala og Sveinn Andri Sveinsson lögmaður að Brynjari.

Þá var Björn Leví Gunnarsson, þingmaður Pírata, nú rétt í þessu að benda á að slíkur fundur geti aldrei verið einkafundur, í besta falli óformlegur en hann verði engu að síður að færa til bókar.