Erna og Soffía ráðnar til Mat­væla­stofnunar

Erna er viðskiptafræðingur með MBA-gráðu með áherslu á fjármál. Þá er hún með diplómu sem viðurkenndur stjórnarmaður. Hún hefur undanfarin tíu ár starfað sem framkvæmdastjóri Barnaheilla á Íslandi.

„Erna er afar reyndur stjórnandi og leiðtogi ásamt því að vera mjög öflug í fjármálastjórn, samskiptum og upplýsingagjöf og hefur leitt samtökin í gegnum mikla uppbyggingu,“ segir í tilkynningu frá MAST.

Soffía er með meistaragráðu í efnafræði og framhaldsmenntun í mannauðsstjórnun og opinberri stjórnsýslu. Hún hefur undanfarin ár unnið sem IB stallari við Menntaskólann við Hamrahlíð.

„Soffía er mikill leiðtogi og teymismanneskja sem hefur tamið sér góða yfirsýn yfir deildina sína,“ segir í tilkynningunni.