Mismunandi og miserfiðar leiðir sem Víkingur getur farið

Valur Páll Eiríksson skrifar 15. júní 2022 12:45

Víkingar mæta Levadia í undanúrslitum umspilsins á þriðjudag og verður leikurinn sýndur beint á Stöð 2 Sport 4. Vísir/Diego

Víkingur frá Reykjavík tekur þátt í forkeppni fyrir undankeppni Meistaradeildar Evrópu í fótbolta í næstu viku. Ljóst er að Víkingar eiga fram undan Evrópueinvígi sama hvernig fer, en mögulegir andstæðingar eru breytilegir eftir því hversu langt þeir komast.

Víkingur mætir Levadia Tallinn frá Eistlandi í undanúrslitum umspilsins þriðjudaginn næsta, 21. júní. Vinnist sá leikur bíður þeirra úrslitaleikur gegn annað hvort La Fiorita frá San Marínó eða Inter d'Escaldes frá Andorra.

Fagni Víkingar sigri þar mæta þeir Malmö FF, undir stjórn fyrrum leikmanns og þjálfara Víkings, Milos Milojevic í fyrstu umferð í undankeppni Meistaradeildarinnar.

Þeir færast aftur á móti í Sambandsdeildina ef þeir tapa fyrir Levadia eða í úrslitaleiknum í forkeppninni. Munur er á hvaða mótherja þeir dragast gegn eftir því á hvoru stigi þeir detta út, ef af því kemur.

Leikur Víkings og Levadia er klukkan 19:30 á þriðjudagskvöld og verður sýndur beint á Stöð 2 Sport 4.

Mögulegir mótherjar Víkings

Ef Víkingur vinnur umspilsmótið mætir liðið Malmö FF í fyrstu umferð Meistaradeildarinnar.

Tapist einvígið gegn Malmö mætir Víkingur annað hvort New Saints frá Wales eða Linfield frá Norður-Írlandi í 2. umferð Sambandsdeildar Evrópu.

Vinni Víkingur lið Malmö mætir liðið annað hvort Ballkani frá Kósóvó eða Zalgiris frá Litáen í 2. umferð Meistaradeildarinnar

Ef Víkingur tapar fyrir Levadia í undanúrslitum umspilsins á þriðjudag fer liðið í 2. umferð Sambandsdeildar Evrópu og mætir annað hvort Shamrock Rovers frá Írlandi eða Hibernians frá Möltu.

Ef Víkingar tapa úrslitaleik umspilsins fara þeir sömuleiðis í 2. umferð Sambandsdeildar Evrópu og mæta annað hvort Pyunik frá Armeníu eða CFR Cluj frá Rúmeníu.

Mögulegir mótherjar Blika og KR

Breiðablik og KR eru hin tvö íslensku liðin í Evrópukeppnum UEFA í ár og eru bæði í Sambandsdeildinni.

Breiðablik mætir Santa Coloma frá Andorra í 1. umferð Sambandsdeildarinnar og vinnist það einvígi bíða þeirra annað hvort Buducnost Podgorica frá Svartfjallalandi eða Llapi frá Kósóvó í 2. umferð.

KR mætir sterku liði Pogon Szczecin frá Póllandi í 1. umferð. Hafi þeir betur munu þeir mæta Bröndby frá Danmörku í 2. umferð.

Sambandsdeild Evrópu Meistaradeild Evrópu í fótbolta karla Víkingur Reykjavík KR Breiðablik