Innlent

Stjórn Ís­lensku óperunnar hefur greitt Þóru

Hallgerður Kolbrún E. Jónsdóttir skrifar
Þóra er ein þekktasta óperusöngkona þjóðarinnar.
Þóra er ein þekktasta óperusöngkona þjóðarinnar. LISTAHÁSKÓLI ÍSLANDS

Óperusöngkonan Þóra Einarsdóttir segist ekkert hafa heyrt frá stjórn Íslensku óperunnar vegna dóms Landsréttar í máli þeirra. Stjórnin sagði í tilkynningu í gær að búið væri að greiða henni vangoldin laun og ræða við fulltrúa söngvara um framtíðina.

Þetta skrifar Þóra í færslu á Facebook en Landsréttur dæmdi í síðustu viku henni í vil í máli hennar gegn Íslensku óperunni. Þóra höfðaði málið vegna greiðslu vangoldinna launa en deilumálið snerist um hvort kjarasamningur Félags íslenskra hljómlistamanna skyldi gilda um atriði er vörðuðu launagreiðslur og yfirvinnu í uppsetningu á Brúðkaupi Fígarós. 

Þóra hafði gert verktakasamning við óperuna vegna uppsetningarinnar en óperan hafnaði að fara eftir ákvæðum kjarasamnings FÍH við uppgjör launa vegna yfirvinnu. Málið fór fyrir Héraðsdóm Reykjavíkur sem dæmdi Íslensku óperunni í vil en Landsréttur sneri þeim dómi við. 

Segir sér ekki kunnugt um vilja til samtals um breytta kjarasamninga

Stjórn Íslensku óperunnar sendu í gær út fréttatilkynningu þar sem hún sagðist una dómi Landsréttar og búið væri að greiða Þóru og öðrum söngvurum sýningarinar Brúðkaup Fígarós í samræmi við niðurstöður dómsins. Þóra segir það ekki rétt. 

„Ég hef ekkert heyrt frá ÍÓ, hvorki frá stjórn né óperustjóra og engar greiðslur hafa borist til mín nú rúmum sólarhring eftir að þessi tilkynningi birtist þar sem fullyrt er að stefnanda hafi þegar verið greitt,“ skrifar Þóra í færslu á Facebook. 

„Sömuleiðis er mér ekki kunnugt um að það sé vilji til samtals um að breyta kjarasamningum okkar enda eru þeir skýrir og bjóða ekki upp á tilefni til „óvissu né ágreinings“ sé farið eftir þeim,“ segir hún.

Hún vísar þar í tilkynningu stjórnar þar sem fram kom óperan hafi haft frumkvæði að því að bjóða fulltrúum söngvara til samtals um hvernig nálgun í samningagerð við söngvara væri best komið í framtíðinni, „svo ekki verði tilefni til óvissu né ágreinings.“

Stjórn Íslensku óperunnar sendi fréttastofu áréttingu eftir að fréttin birtist þar sem stjórnin segir að bæði málskostnaður, 2,8 milljónir króna, og upphæðin sem henni var dæmd, tæpar 640 þúsund krónur, hafi þegar verið lagðar inn á fjárvörslureikning lögmanns hennar í samræmi við það sem beðið var um. 

Stjórn íslensku óperunnar sendi meðfylgjandi kvittun því til sönnunar að Þóru hafi verið greiddar dæmdar bætur.Stjórn íslensku óperunnar

Þóra segist í færslunni hafa fundið fyrir miklum stuðningi og gleði um allt samfélagið fyrir sína hönd og allra söngvara.

„Hamingjuóskir hafa borist til mín víða að, sérstaklega frá tónlistarfólki en einnig öðru listafólki og velunnurum lista í landinu. Ókunnugir stoppa mig á götu og óska til hamingju,“ skrifar Þóra. 

„Ég hef aldrei upplifað annað eins og þetta er mér mikils virði eftir þennan erfiða tíma. Takk allir innilega fyrir stuðninginn.“


Tengdar fréttir

Ís­lenska óperan hyggst ekki á­frýja dómi Lands­réttar

Stjórn Íslensku óperunnar hefur ákveðið að una dómi Landsréttar í máli Þóru Einarsdóttur gegn Íslensku óperunni. Fram kemur í tilkynningu frá stjórninni að óperan hafi þegar greitt Þóru og öðrum söngvurum sýningarinnar Brauðkaup Fígarós í samræmi við niðurstöðu dómsins. 

Þóru létt eftir að hafa lagt Óperuna í launadeilu fyrir Landsrétti

Landsréttur hefur snúið við niðurstöðu héraðsdóms í máli Þóru Einarsdóttur gegn Íslensku óperunni, Þóru í vil. Þóra, sem er ein fremsta óperusöngkona þjóðarinnar, höfðaði málið vegna greiðslu vangoldinna launa. Dómurinn var kveðinn upp í Landsrétti í dag.

Þóra áfrýjar málinu gegn Íslensku óperunni

Þóra Einarsdóttir óperusöngkona hefur ákveðið að áfrýja dómi Héraðsdóms Reykjavíkur frá 8. janúar, þar sem Íslenska óperan var sýknuð af kröfu Þóru um vangoldin laun vegna þátttöku hennar í uppsetningu óperunnar á Brúðkaupi Fígarós árið 2019.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×