Innlent

Biskup hefur veitt séra Davíð form­legt til­tal fyrir „harka­leg og ó­smekk­leg skrif“

Hallgerður Kolbrún E. Jónsdóttir skrifar
Agnes M. Sigurðardóttir biskup Íslands segir kirkjuna taka yfirlýsingu Séra Davíðs Þórs mjög alvarlega.
Agnes M. Sigurðardóttir biskup Íslands segir kirkjuna taka yfirlýsingu Séra Davíðs Þórs mjög alvarlega. Vísir

Biskup Íslands hefur veitt séra Davíði Þór Jónssyni formlegt tiltal fyrir þau „harka­legu og ó­smekk­legu skrif sem hann viðhafði á Facebook-vettvangi“ sínum í gær. Davíð Þór sagði þar að sérstakur staður væri í helvíti fyrir stjórnarliða Vinstri grænna. 

Fram kemur í yfirlýsingu frá biskupi Íslands að biskup hafi gagnrýnt áform íslenskra yfirvalda um fyrirhugaðar fjöldabrottvísanir hælisleitenda sem fest hafa rætur hér á landi. Prestum Þjóðkirkjunnar beri hins vegar að haga málflutningi sínum málefnalega og meiða ekki með orðum. 

„Í ljósi þessa hefur biskup Íslands veitt sr. Davíð Þór Jónssyni formlegt tiltal fyrir þau harkalegu og ósmekklegu skrif sem hann viðhafði á Facebook-vettvangi sínum 24. maí sl. Málinu telst lokið af hálfu biskups. Eftir stendur sem meira máli skiptir ákall biskups Íslands um mannúð og mildi þegar kemur að málefnum hælisleitenda,“ segir í yfirlýsingunni.

Agnes M. Sigurðardóttir biskup Íslands sagði í gær í samtali við mbl.is að yfirlýsing séra Davíðs um að flokksmenn Vinstri grænna eigi helvítisvist vísa stangist á við siðareglur presta. Agnes segir í samtali við fréttastofu í dag að málið sé litið mjög alvarlegum augum af Þjóðkirkjunni.

Fyrirhugaðar brottvísanir hátt í þrjú hundruð umsækjenda um alþjóðlega vernd eru þær umfangsmestu í Íslandssögunni og hafa reynst afar umdeildar. Jón Gunnarsson dómsmálaráðherra hefur sagt að með brottvísunum sé aðeins verið að fara eftir lögum og reglum. 

Svo virðist þó sem ekki allir ráðherrar séu sáttir með brottvísanirnar og hefur Guðmundur Ingi Guðbrandsson félags- og vinnumarkaðsráðherra sagst óánægður með hvernig dómsmálaráðherra hefur haldið á og rætt um mál þeirra hælisleitenda sem stendur til að vísa úr landi. Guðmundur Ingi sagðist í gær hafa gert alvarlegar athugasemdir við málsmeðferðina á ríkisstjórnarfundi í gær.

Kennir ríkisstjórnina við fasisma og hótar henni helvítisvist

Yfirlýsing Séra Davíðs Þórs Jónssonar í gær hefur vakið mikla athygli en þar sagði hann að sérstakur staður sé í helvíti fyrir fólk sem selji sál sína fyrir völd og vegtyllur, og vísaði þar í aðgerðaleysi stjórnvalda vegna fjöldabrottvísana sem standa til á næstunni. 

„Í fréttum er það helst að fasistastjórn VG hefur ákveðið að míga á Barnasáttmála SÞ, sem hún þó lýgur því að hún hafi „lögfest“ á Íslandi, en þar kemur skýrt fram að hann gildi um öll börn í lögsögu hvers ríkis - óháð því með hvaða hætti þau komu þangað,“ skrifaði Davíð Þór í færslu á Facebook í gær. 

„Samt á að senda fjölda barna úr langþráðu öryggi og skjóli hér á Íslandi, þvert á það sem þeim er fyrir bestu, til að hafast við í fullkomnu reiðuleysi á götum úti á Grikklandi, jafnvel þótt Flóttamannahjálp SÞ hafi af mannúðarástæðum lagst eindregið gegn því að fólk sé flutt þangað.“

Hann sagði að til þess að bíta höfuðið af skömminni sé málsvörn VG fólgin í „innihaldslausu froðusnakki“ um „heildstæða stefnumótun í málaflokkum“ og segir hann stjórnvöld hafa vænt formann Rauða krossins um lygar þegar hún hafi lýst ástandinu á Grikklandi. 

„Þetta er í beinni mótstöðu við það hvernig VG liðar töluðu um þessi mál þegar þeir voru í stjórnarandstöðu. Þinglið og ráðherrar VG eru ekki lengur bara meðsek um glæpi þessarar ríkisstjórnar gegn mannúð og góðu siðferði, þau eru einfaldlega sek eins og syndin. Það er sérstakur staður í helvíti fyrir fólk sem selur sál sína fyrir völd og vegtyllur,“ skrifaði Davíð.

„Núna er þetta hatursorðræða sem fólk vill taka alvarlega“

Einhverjir hafa gagnrýnt Davíð Þór fyrir ummæli hans, meðal annars Björn Ingi Hrafnsson ritstjóri á Viljanum. Hann skrifar á Facebook í gær að hann hafi andstyggð á því að fólk sem hér hafi skotið rótum sé sent úr landi. Hann sé hins vegar feginn því að Davíð Þór sé ekki hans sóknarprestur og bendir á að Davíð Þór sé fyrrverandi sambýlismaður Katrínar Jakobsdóttur forsætisráðherra og sendi henni í færslu sinni „ómerkilega skítapillu.“

Af athugasemdum við færslu Björns Inga að dæma eru fleiri sama sinnis. Orri Páll Jóhannsson þingflokksformaður Vinstri grænna fordæmdi sömuleiðis í gær yfirlýsingu Davíðs Þórs og sakaði hann um að ala á hatursorðræðu. 

„Með þessum ummælum er verið að ala á hatursorðræðu í samfélaginu sem er eitt stærsta mein okkar samtíma. Það er grafalvarlegt að Þjóðkirkjan taki þátt í slíku,“ sagði Orri Páll í svari við fyrirspurn Fréttablaðsins í gær. 

Orri Páll hefur verið gagnrýndur fyrir viðbrögð sín vegna málsins og gagnrýndi Lenya Rún Taha Karim, varaþingmaður Pírata, Orra meðal annarra á Twitter. Lenya hefur verið ötull talsmaður gegn hatursorðræðu, þar á meðal á þinginu. 

Fjöldi fólks hefur lýst yfir stuðningi við Davíð Þór, meðal annars á Facebook, þar sem finna má tugi færslna sem hann hefur verið merktur í á Facebook-síðu hans. Davíð skrifaði þá á Facebook að hann hafi verið að vísa í orð til dæmis Madeleine Albright og Martin Luther King þegar hann sagði sérstakan stað í helvíti fyrir valdafólk. 

Ekki náðist í Davíð Þór við vinnslu fréttarinnar. 


Tengdar fréttir

Guðmundur Ingi óánægður með Jón

Guðmundur Ingi Guðbrandsson, félags- og vinnumarkaðsráðherra, segist ekki vera ánægður með hvernig Jón Gunnarsson dómsmálaráðherra hefur haldið á og rætt um mál þeirra hælisleitenda sem stendur til að vísa úr landi á næstunni eftir langa dvöl hér á landi. Guðmundur Ingi segist hafa gert alvarlegar athugasemdir við málsmeðferð málsins á ríkisstjórnarfundi í dag.

Forsætisráðherra segir fordæmi fyrir inngripi

Forsætisráðherra segir til athugunar að endurskoða það að vísa fólki úr landi til Grikklands. Heldur hefur fækkað í hópi þeirra sem vísa á úr landi á næstu dögum, samkvæmt upplýsingum frá ríkislögreglustjóra.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.