Heimsmarkmiðin

Fljótandi vindorkuver á hafi úti nýr kostur í hreinni orku

Heimsljós
Alþjóðlegur dagur móður jarðar í dag.
Alþjóðlegur dagur móður jarðar í dag.

Alþjóðlegur dagur móður jarðar er í dag, 22. apríl.

„Á degi móður jarðar er viðeigandi að fagna náttúrunni og fjölskrúðugu dýralífi, en ekki síður að leita lausna á þeim vanda sem notkun „svartra” orkugjafa á borð við olíu og kol hefur valdið,“ segir í frétt frá Upplýsingaskrifstofu Sameinuðu þjóðanna, UNRIC. Alþjóðlegur dagur móður jarðar er í dag, 22. apríl.

UNRIC segir að dagur jarðar sé kjörið tækifæri til þess að gefa sér tíma til að hugsa um nýja kosti í orkumálum og hreinni orku. Dæmi um slíkt séu fljótandi vatnsmyllur. „Einn af þeim endurnýjanlegu orkugjöfum sem sækja má til náttúrunnar er vindorka, en hana má ekki síður beisla á hafi úti en á landi. Auðvitað eru það fyrst og fremst ríki með langa strandlengju sem geta nýtt sér slíkt. Nú er kominn fram á sjónarsviðið nýr kostur sem auðveldar nýtingu vindsins: fljótandi vindmyllur.

Fram kemur í fréttinni að margar ástæður séu fyrir því að beisla vind á hafi úti. Vindmyllugarðar geti beislað meiri orku einfaldlega af því að vindhraði sé meiri á hafinu. Önnur ástæða sé andstaða gegn vindmyllum á landi. Þær þyki valda sjónmengun og margir vilji vindmyllur alls staðar annars staðar en í sínum eigin garði. Þá segir að þeirri tækni sem búi að baki vindmyllum á sjó hafi fleygt fram undanfarið.

Vindorkugarður á hafi úti.UNSplash

„Hingað til hafa vindmyllur þurft á stoðum á sjávarbotni að halda og því hefur einungis verið hægt að staðsetja þær á grunnsævi, oftast nærri landi. Þetta hefur ekki valdið löndum á borð við Danmörku og Holland vandræðum af landfræðilegum ástæðum. Fyrsta vindorkubú Dana á hafi er nú orðið meir en þrjátíu ára. Fjótandi vindmyllur þurfa hins vegar ekki að vera festar niður og því opnast miklir möguleikar. Hægt verður að koma þeim fyrir óháð dýpi.“

Að mati Umhverfisstofnunar Sameinuðu þjóðanna er orkunotkun helsti orsakavaldur loftslagsbreytinga. Sextíu prósent losunar allra gróðurhúsalofttegunda má rekja til orkunotkunar. Þrír milljarðar manna treysta á eldivið, kol, viðarkol eða úrgang dýra til eldamennsku og hita. Af þeim sökum er sjöunda heimsmarkmið Sameinuðu þjóðanna um sjálfbæra þróun helgað því að „tryggja öllum aðgang að öruggri og sjálfbærri orku á viðráðanlegu verði.” Þar er gert ráð fyrir því að auka hlut endurnýjanlegrar orku í heiminum.

Alþjóðlegur dagur móður jarðar er helgaður fræðslu um umhverfismál og hét áður Dagur jarðar. Sameinuðu þjóðirnar breyttu heiti hans árið 2009 í alþjóðlegan dag móður jarðar.


Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



Velkomin á Vísi. Þessi vefur notar vafrakökur. Sjá nánar.