Lífið

Ásdís Rán býr enn í íbúð vinkonunnar sem hvarf

Bjarki Sigurðsson skrifar
Dóttir Ásdísar, Ruja Ignatova og Ásdís Rán á kynningu fyrir OneCoin.
Dóttir Ásdísar, Ruja Ignatova og Ásdís Rán á kynningu fyrir OneCoin. Aðsend

Í nóvember árið 2019 greindi DV frá því að athafnakonan og fyrirsætan Ásdís Rán Gunnarsdóttir væri flækt í stórt fjársvikamál tengt hinni búlgörsku Ruja Ignatova. Ignatova hafði stofnað rafmyntina OneCoin sem átti að vera arftaki Bitcoin en Ruja hvarf sporlaust árið 2017.

Í nýjasta þætti hlaðvarpsins Eftirmálar sem fyrrum fréttakonurnar Þórhildur Þorkelsdóttir og Nadine Guðrún Yaghi sjá um, er fjallað um þetta mál og rætt við Ásdísi.

Vinkonurnar kynntust í Búlgaríu þegar Ásdís bjó þar ásamt þáverandi eiginmanni sínum, knattspyrnumanninum Garðari Gunnlaugssyni, sem þá lék fyrir CSKA Sofia. Ruja hjálpaði Ásdísi verulega með fyrirtæki hennar, Ice Queen, sem seldi meðal annars undirföt, snyrtivörur og húðvörur.

Rafmyntin sem átti að breyta heiminum

Þegar þær kynntust átti Ruja ekki gífurlegt magn fjár en það átti eftir að breytast þegar hún stofnaði rafmyntina OneCoin.

Rafmyntir eru ekki til nema að þær séu inni á svokölluðu „blockchain“ en OneCoin var ekki til þar. Ruja var því að selja fólki eitthvað sem var ekki til og græddi milljarða.

Klippa: Ás­dís Rán og raf­mynta­drottningin sem hvarf

Þegar Ásdís ferðaðist til Íslands árið 2017 grunaði hana ekki að hún myndi ekki hitta bestu vinkonu sína aftur.

„Ég þurfti að fara til Íslands og flýg þangað en næ ekki að segja almennilega bæ við hana eins og ég myndi segja ef ég hefði vitað að ég myndi ekkert hitta hana aftur. Við spjöllum smá næstu daga, svo er ég eitthvað upptekin og var ekkert að pæla í henni í svona viku,“ segir Ásdís.

Þegar hún ætlaði að heyra í vinkonu sinni að nýju var hana þó hvergi að finna. Hún var ekki virk á samfélagsmiðlum í marga klukkutíma en Ásdís segir það hafa verið óeðlilegt fyrir hana. Þessir klukkutímar eru nú orðnir að fjórum og hálfu ári. 

Ásdís hefur ekkert heyrt frá Ruja í rúm fjögur ár.Aðsend

Hvað varð um Ruja?

Hvort Ruja hafi flúið til að losna við ákærur vegna OneCoin eða verið drepin af fólki sem vildi auðæfi hennar er ekki vitað.

„Það var fullt af fólki sem hefði getað drepið hana út af því hún var það valdamikill og það miklir peningar í gangi,“ segir Ásdís sem telur þó að Ruja sé enn á lífi.

Stuttu eftir hvarfið var Ruja orðin eftirlýst af Interpol vegna fjársvika. Lögmaður hennar og bróðir hennar voru handteknir, ákærðir og dæmdir. Ruja sjálf hefur þó aldrei þurft að svara fyrir gjörðir sínar.

Sloppið við yfirheyrslur

Konstantin Ignatov, bróðir Ruja, tók við rekstri OneCoin eftir hvarfið. Hann játaði allt skýlaust fyrir dómi og hlaut vægari dóm fyrir vikið. Flestir í kringum Ruja hafa verið yfirheyrðir við rannsókn málsins en Ásdís hefur þó sloppið þrátt fyrir að vera hennar hægri hönd í einkalífinu.

„Ég veit að símarnir mínir voru hleraðir fyrstu mánuðina, ég veit ekki hvort þeir séu hleraðir enn þá í dag,“ segir Ásdís en hún fékk aldrei að vita neitt hvað var í gangi á bak við tjöldin hjá OneCoin. Ruja sagði við Ásdísi að ástæðan væri að hún væri að vernda vinkonu sína.

Líferðir og brynvarðir bílar

Þegar Ásdís lítur um öxl segist hún hafa gert sér grein fyrir því að það væri eitthvað skringilegt í gangi hjá Ruja nokkru fyrir hvarfið.

„Það var bara út af því ég sá hvað hún var orðin tæp á geði og hrædd. Við vorum út um allt með tíu lífverði og brynvarða bíla. Hún var orðin mjög tense og dróg sig svolítið til hlés. Hún grét mikið í fanginu á mér en ég sá að hún gat ekki alveg sagt mér hvað var í gangi,“ segir Ásdís.

Henni finnst skrítið að Ruja hafi ekki reynt að hafa samband við sig í öll þessi ár.

„Mér finnst samt mjög skrítið, því hún var svo háð mér. Ég myndi halda að hún myndi reyna að ná í mig á einhverjum miðli, vera með feik-reikning eða hringja í mig úr tíkallasíma eins og í bíómyndunum.“

Ásdís ásamt þáttarstjórnendum Eftirmál, þeim Þórhildi (t.v.) og Nadine.Aðsend

Býr enn í íbúð hennar

Ásdís er enn með skráð heimili í íbúð Ruja í Sofia, höfuðborg Búlgaríu, og er nýkomin þaðan eftir að hafa verið í tökum fyrir þýska þætti sem fjalla um Ruja og hvarfið á henni. Áhugi fjölmiðla á málinu er gífurlegur.

„Ég er búin fá tilboð frá öllum heimshornum um að gera allskonar þætti. Það er verið að gera bíómynd um hana.“

BBC hefur gefið út hlaðvarpsþætti um Ruja sem bera heitið „The Missing Cryptoqueen“ og var mikil vinna lögð í þá þætti. Ásdís gaf ekki kost á sér í viðtal fyrir þættina en henni fannst blaðamenn BBC stunda of mikla æsifréttamennsku í kringum þá.


Tengdar fréttir

Telur Ignatovu hafa flúið undan rannsóknum

Ásdís Rán Gunnarsdóttir, athafnakona og fyrirsæta, segist trúa því að gömul og góð vinkona hennar til margra ára, Ruja Ignatova, hafi látið sig hverfa til að sleppa við fangelsisvist á meðan rannsóknir gegn henni stæðu yfir.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.