Innherji

Þurfi að horfa til þess hvað orsakar hærri vexti

Ólöf Skaftadóttir skrifar
Sigurður Hannesson, framkvæmdastjóri Samtaka iðnaðarins.
Sigurður Hannesson, framkvæmdastjóri Samtaka iðnaðarins. Vísir/Egill

Framkvæmdastjóri Samtaka iðnaðarins segir mikið í húfi að vel takist til í komandi kjaraviðræðum.

„Aðilar vinnumarkaðarins þurfa að eiga yfirvegað samtal um tækifærin sem framundan eru og til hvaða aðgerða þarf að grípa til að efla velsæld landsmanna. Ljóst er að launahlutfall er alltof hátt í mörgum atvinnugreinum þannig að svigrúm til launahækkana er lítið sem ekkert,” segir Sigurður.

Á sama hátt hafi hækkun á verði aðfanga dregið úr getu fyrirtækja til að hækka laun.

„Það má búast við að kallað verði eftir úrræðum í húsnæðismálum þar sem skortur hefur leitt til hækkandi verðs á íbúðum sem aftur hefur leitt til aukinnar verðbólgu og hækkunar vaxta. Húsnæðismálin hafa hvílt þungt á fólki og því er mikilvægt að viðunandi lausnir verði fundnar á vandanum. “

Sigurður segir áskoranir sem fylgt hafa heimsfaraldrinum séu fjölmargar hjá atvinnurekendum.

„Það er óhætt að segja að það hafi verið unnið þrekvirki bæði hjá stjórnendum og starfsmönnum í því að halda starfsemi fyrirtækja gangandi við þessar erfiðu aðstæður. Fyrirtæki innan Samtaka iðnaðarins hafa séð landsmönnum fyrir matvælum og öðrum nauðsynjum, annast framkvæmdir við innviða- og íbúðauppbyggingu og skapað verðmæti til útflutnings.

Húsnæðismálin hafa hvílt þungt á fólki og því er mikilvægt að viðunandi lausnir verði fundnar á vandanum.

Með mikilli útsjónarsemi hefur tekist að halda starfsemi gangandi þrátt fyrir mikla röskun í flutningum og hækkun á verði aðfanga. Staðan á húsnæðismarkaði er grafalvarleg þar sem of fáar íbúðir hafa verið byggðar undanfarinn áratug eða svo og húsnæðisverð hefur hækkað mikið á tímum heimsfaraldurs. Enn ríkari ástæða er því til að bregðast við stöðunni á húsnæðismarkaði með markvissum aðgerðum.“

Rót vandans sé lóðaskortur

„Við hjá Samtökum iðnaðarins höfum ítrekað bent á að hækkandi húsnæðisverð sé meginorsök hækkunar verðbólgu sem hefur leitt til hækkunar vaxta,” segir Sigurður.

Ef ráðist verði að rót vandans, lóðaskorti, þá muni draga úr þessum áhættuþætti.

„Fyrir launþega væri því mikill ávinningur fólginn í því að mæta þessum skorti af myndarskap þannig að dragi úr verðhækkunum fasteigna. Annar þáttur verðbólgunnar er hækkun á verði aðfanga og hækkun flutningskostnaðar. Það er erfitt að ráða við þær hækkanir og enn sem komið er hefur tekist að láta það ekki koma niður á neytendum af fullum þunga,” segir hann.

En hvað finnst fulltrúum atvinnurekenda um þau orð sem formaður VR og formaður verkalýðsfélags Akraness hafa m.a. látið falla um að „hver einasta króna" sem lögð yrði á heimilin, í formi hærri vaxta, verði sótt tilbaka í næstu kjarasamningum?

„Fyrirtækin og launþegar eru þarna á sama báti og greiða hærri vexti þegar stýrivextir Seðlabankans hækka. Það er því ekkert að sækja til fyrirtækja landsins á þessum forsendum,” segir Sigurður.

„Þarna þarf að horfa til þess hvað orsakar hærri vexti og ráðast að rót vandans. Með samstilltu átaki verkalýðshreyfinga og atvinnurekenda í húsnæðismálum væri hægt að skapa kjarabætur sem um munar.”

Samtal aðila vinnumarkaðarins þurfi að vera uppbyggilegt þar sem markmiðið ætti að vera aukin verðmætasköpun þannig að meira verði til skiptanna.

Annar þáttur verðbólgunnar er hækkun á verði aðfanga og hækkun flutningskostnaðar. Það er erfitt að ráða við þær hækkanir og enn sem komið er hefur tekist að láta það ekki koma niður á neytendum af fullum þunga

„Styðja þarf við útflutningsgreinarnar og þá sérstaklega hugverkaiðnaðinn sem er sú grein sem er í hvað mestum vexti. Nú er hugverkaiðnaður orðinn fjórða stoðin í gjaldeyrissköpun þjóðarbúsins auk sjávarútvegs, orkusækins iðnaðar og ferðaþjónustunnar. Samtal aðila vinnumarkaðarins þarf að taka mið af því. Ef rétt er á spilum haldið væri hægt að leggja grunn að vaxtarskeiði sem allir njóta góðs af.“


Innherji hefur undanfarið og mun áfram birta viðtöl við forsvarsmenn verkalýðsfélaga og atvinnurekenda þar sem fjallað verður almennt um kjarasamningsviðræður sem framundan eru.


Innherji er nýr sjálfstæður áskriftarmiðill innan Vísis sem mun einkum beina kastljósinu að viðskiptalífinu, efnahagsmálum og stjórnmálum. Fyrst um sinn verður efnið endurgjaldslaust og aðgengilegt öllum á Vísi en með tímanum verður einungis hægt að nálgast Innherja gegn greiðslu. Áhersla er lögð á vandaðar fréttir, fréttaskýringar, viðtöl og hlaðvörp auk þess sem Innherja er ætlaður að vera vettvangur skoðanaskipta fólks úr atvinnulífinu og stjórnmálum.


Tengdar fréttir

Krónutöluhækkanir komi ekki til greina framvegis

„Það liggur fyrir að lífskjarasamningarnir voru háskólamenntuðum um margt óhagfelldir. Það stefnir í að kaupmáttaraukning þeirra verði í besta falli engin á mörgum mörkuðum. Það mun hafa áhrif á okkar áherslur. Krónutöluhækkanir koma ekki til greina framvegis," segir Friðrik Jónsson, formaður BHM.

Krónutöluhækkanir komi ekki til greina framvegis

„Það liggur fyrir að lífskjarasamningarnir voru háskólamenntuðum um margt óhagfelldir. Það stefnir í að kaupmáttaraukning þeirra verði í besta falli engin á mörgum mörkuðum. Það mun hafa áhrif á okkar áherslur. Krónutöluhækkanir koma ekki til greina framvegis," segir Friðrik Jónsson, formaður BHM.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.