Sautján ára fangelsi fyrir að bana unnusta móður sinnar í Torrevieja

Gunnar Reynir Valþórsson og Atli Ísleifsson skrifa 16. desember 2021 08:42

Guðmundur Freyr var sakfelldur fyrir að hafa stungið sambýlismann móður sinnar endurtekið með þeim afleiðingum að hann lést. Lögreglan á Alicante

Íslenskur karlmaður, Guðmundur Freyr Magnússon, var í síðustu viku dæmdur í sautján ára fangelsi á Spáni fyrir að verða 66 ára unnusta móður sinnar að bana á heimili þeirra í Torrevieja á Spáni í janúar á síðasta ári.

Frá þessu greindi spænski miðillinn Informacion á dögunum. DV fjallar um málið og þar segir að auk fangelsisdómsins þurfi Guðmundur að greiða aðstandendum hins myrta 100 þúsund evrur, um fimmtán milljónir króna, í skaðabætur.

Eins og Vísir greindi frá á sínum tíma viðurkenndi Guðmundur sök þegar málið var tekið fyrir og er það virt honum til refsilækkunar. Einnig virðir dómarinn Guðmundi það til refsilækkunar að hann hafi verið í sturlunarástandi sökum mikillar fíkniefnaneyslu.

Dómarinn sakar Guðmund þó að sögn DV um mikla grimmd að hafa valdið fórnarlambi sínu óþarfa þjáningu með því að stinga hann margsinnis með hnífi og skilja hann svo eftir á lífi. Á endanum blæddi manninum út.

Manndráp í Torrevieja Spánn Íslendingar erlendis

Tengdar fréttir

Viðurkenndi að hafa stungið sambýlismann móður sinnar ítrekað

Guðmundur Freyr Magnússon viðurkenndi að hann hefði orðið íslenskum sambýlismanni móður sinnar að bana með því að stinga hann ítrekað í Torrevieja á Spáni þegar mál hans var tekið fyrir dóm í Elche í síðustu viku. Bar hann við fíknivanda og geðrænum vandamálum.

29. nóvember 2021 18:18

Íslendingurinn einnig ákærður fyrir að reyna að drepa móður sína

Íslenskur karlmaður sem situr í gæsluvarðhaldi í Alicante á Spáni grunaður um að hafa orðið sambýlismanni móður sinnar að bana er bæði ákærður fyrir manndráp en sömuleiðis fyrir tilraun til þess að drepa móður sína.

15. janúar 2020 14:06

Íslendingurinn úrskurðaður í gæsluvarðhald á Spáni

Dómari á Spáni hefur úrskurðað Guðmund Frey Magnússon, sem grunaður er um að hafa banað sambýlismanni móður sinnar aðfaranótt sunnudags, í gæsluvarðhald.

14. janúar 2020 14:57

Mest lesið

Fleiri fréttir