Skorar á Dag B. að mæta á eina vakt uppi í Mosó

Snorri Másson skrifar 6. desember 2021 12:05

„Ég verð að fara út í hvaða veðri sem er, hvort sem mér líkar verr eða betur,“ segir Björg Loftsdóttir sjúkraliði hjá Reykjavíkurborg sem fær ekki að nota nagladekk við heimahjúkrun. Vísir/Sigurjón

Hálka gerir Íslendingum lífið leitt. Jafnvel sjálfir söltunarbílar hins opinbera runnu til í glærahálku í morgun og sjúkraliði hjá Reykjavíkurborg hótar að leita sér að öðru starfi ef hún fær ekki að sinna heimahjúkrun á nagladekkjum.

Ákveðið var fyrir skemmstu að taka alla bíla á vegum borgarinnar af nagladekkjum, enda vilja borgaryfirvöld ganga á undan með góðu fordæmi í þeim efnum. Nagladekk eru enda mun meira slítandi en ónegld vetrardekk og eru meginorsök svifryks.

En þetta kemur illa niður á Björgu Loftsdóttur, sjúkraliða sem starfar við heimahjúkrun fyrir Reykjavíkurborg. Hún heimsækir fólk í öllum veðrum og það oft upp í efri byggðir borgarinnar og fáfarnari staði þar sem stundum er minna mokað og saltað. Björg var til viðtals í Morgunblaðinu í dag.

„Við vorum komin á nagla búin að vera á þeim í þrjár vikur og allir voru svo sendir að taka naglana af,“ segir Björg í samtali við fréttastofu, sem kveðst vera að íhuga að leita sér að annarri vinnu ef hún getur ekki komist örugg á leiðarenda við sín störf.

Á ónegldum Yaris í sveitinni

Dagur B. Eggertsson borgarstjóri hefur talað fyrir því að sem fæstir keyri á nagladekkjum innanbæjar.Vísir/Vilhelm

Samfylkingin hefur lagt til á Alþingi að Reykjavíkurborg fái heimild til að rukka fólk á nöglum um allt að fjörutíu þúsund krónum á ári. Björg telur sjálfsagt að draga úr notkun nagladekkja hjá fjölskyldubílum innanbæjar en segir allt annað uppi á teningnum þegar komið er í efri byggðir.

„Ein lenti í því að vera hérna í efri byggðum og var að keyra upp brekku og ætlaði aldrei að ná upp brekkuna. Hún sagðist hafa verið heppin að enginn hafi verið fyrir aftan hana því hún rann alltaf aftur niður. Hún var á Toyota Yaris, ónegldum,“ segir Björg.

Björg hvetur borgarstjóra til að setja sig í þeirra spor.

„Dagur B. Eggertsson ætlar að prófa sjálfur, held ég, að keyra á ónegldum. Ég býð hann velkominn upp í efri byggð og taka eina kvöldvakt á ónegldum bílum og fara hérna innst inn í Mosó og svo framvegis og taka eina góða kvöldvakt þegar brjálað veður er. Velkominn.“

Þær voru annars sagðar einkar erfiðar aðstæðurnar sem mættu vetrarþjónustunni hjá Reykjavíkurborg í morgun þegar söltun og mokstur hófust klukkan hálffimm. Það var heiðríkja og frost í jörðu, sem svo gufaði upp þegar hlýnaði aðeins með morgninum.

Slíkar aðstæður geta valdið glærahálku með tilheyrandi hættu - í Kópavogi var sagt frá því að söltunarbíll hafi misst stjórn og runnið utan í fimm kyrrstæða bíla.

Umhverfismál Umferðaröryggi Reykjavík Mosfellsbær Nagladekk

Tengdar fréttir

Vilja að heimilt verði að rukka þá sem nota nagladekk

Þingmenn Samfylkingarinnar hafa lagt frumvarp á Alþingi um breytingar á umferðarlögum þess efnis að sveitarstjórnum verði heimilt að rukka fyrir notkun á nagladekkjum.

2. desember 2021 22:01

Uggandi yfir nýju fyrirkomulagi og kalla eftir skýrum aðgerðum

Stjórn Landverndar fagnar markmiðum nýrrar ríkisstjórnar í loftslagsmálum en kallar eftir skýrari aðgerðum til að ná þeim. Áform um að ganga gegn áliti fagaðila varðandi rammaáætlun þrjú sé stríðsyfirlýsing. Þá óttast Landvernd að sama ráðuneytið haldi utan um orkumál og náttúruvernd.

29. nóvember 2021 12:11

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir