Innlent

Biður Loga Berg­mann og aðra Stulla inni­lega af­sökunar

Jakob Bjarnar skrifar
Forritarinn Guðni Þór hefur nú stigið fram og gengist við því að hafa skrifað hugbúnaðarlausn sem gerði fáeinum útvöldum kylfingum kleift að skrá rástíma á sig með handhægum hætti. Hann hefur nú opnað fyrir aðgang að því tóli svo allir sitji við sama borð.
Forritarinn Guðni Þór hefur nú stigið fram og gengist við því að hafa skrifað hugbúnaðarlausn sem gerði fáeinum útvöldum kylfingum kleift að skrá rástíma á sig með handhægum hætti. Hann hefur nú opnað fyrir aðgang að því tóli svo allir sitji við sama borð. hí/skjáskot

Guðni Þór Björnsson forritari hefur gefið sig fram sem höfundur forrits eða „scriptu“ sem gerði golfhópnum Stullunum og fleiri aðilum kleift að bóka rástíma með leifturhraða.

„Jæja... ég bjóst aldrei við því að verða fyrir barðinu á virkum í athugasemdum en ætli það sé ekki best að koma hreint fram og vil ég byrja á því að biðja Loga Bergmann og aðra „Stulla“ innilega afsökunar.“

Svo hefst ítarlegur pistill Guðna Þórs sem hann birtir á lokuðum Facebook-hópi forritara. Þar lýsir hann því hvernig hann skrifaði „tölvukerfi“ sem hann deildi með vini sínum og kom þannig öðrum í bobba, að sögn. Guðni Þór hefur nú veitt öllum kylfingum öllum aðgengi að kerfinu.

Ókátir kylfingar vegna hins meinta tölvuhakks

Fréttir í gær fengu hárin á kylfingum landsins til að rísa og spöruðu margir sig ekki í allsherjar fordæmingum. Fyrstu fréttir gáfu til kynna að hópur kylfinga hafi stundað það í sumar að hakka sig inn á Golfbox, skráningarkerfi GSÍ, en þar bóka kylfingar rástíma. Og svindla sér þannig fram fyrir röðina. Í sumar sem leið var nánast slegist um rástímana og fengu færri en vildu. Þetta var þó ekki með öllu nákvæmt því um er að ræða forrit sem gerir þeim sem það notar kleift að ganga fyrr frá skráningu en ekki þannig að þeir hinir sömu komist að til að skrá sig fyrir opnun. Vísir fjallaði um málið í gær.

Guðni Þór fer ítarlega yfir málið í pistli sínum, segist stunda golf og rekur að það hafi reynst erfitt að fá rástíma og eitt kvöldið hafi skrifað einfalt tölvukerfi eða „scriptu“ til að gera honum leikinn hægari við skráningu.

„Ég deildi þessari script-u með einum vini mínum, fellow golfara og tölvunarfræðingi sem fékk mitt leyfi til þess að nota scriptuna. Hann hefur tengsl í þennan Stulla hóp sem fjallað hefur verið um. Í hreinskilni sagt er það mér að kenna að upp um þetta komst - en ég gleymdi að setja annan User-Agent í login request þó ég hefði munað eftir því annarsstaðar (því hefur nú verið kippt í liðinn),“ segir Guðni Þór í pistli sínum.

Forritarinn veltir þá fyrir sér hvað getur flokkast sem ósanngjarnt forskot og hvað ekki. Menn hafi mismunandi hreyfigetu, þeir sem yngri eru hafi forskot yfir kvöldsvæf gamalmenni og svo framvegis. Hann sem fagmaður búi yfir forskoti, hans „scripta“ sé hans vafri og hann vitnar í reglur sem GSÍ gaf út þegar málið kom upp, sem hann segir að fái trauðla staðist.

„Leyfilegur aðgangur þinn að vefsíðunni er bundinn við aðganginn sem slíkan, skoðunar vefsíðunnar og til skráninga á vefsíðunni. Leyfilegur aðgangur þinn nær ekki til annarrar notkunar á efni eða vefsíðu. Öll notkun hugbúnaðar eða skrifta er óheimil að öðru leyti en nauðsynleg er vegna leyfilegra athafna þinna sem samþykktar hafa verið af GolfBox og/eða Golfsambandi Íslands. Í þessu felst, en er þó ekki einskorðað við, að notendum er óheimilt án sérstaks leyfis Golfsambands Íslands að tengja vefsíðuna við aðra vefsíðu og/eða hvers kyns hugbúnað, eða gera vefsíðuna hluta af annarri vefsíðu án skriflegs samþykkis Golfsambands Íslands. Leyfi þitt fellur sjálfkrafa niður ef þú brýtur einhver atriði þessara skilmála.“


Margir saklausir hafðir fyrir rangri sök

Guðni Þór segir að flestir sem nefndir hafi verið í tengslum við málið séu saklausir, hann hafi til dæmis tekið að sér að skrá tíma sinna golffélaga, líkt og Steingrímur Gautur Pétursson í Stullunum lýsti fyrir blaðamanni Vísis í gær. Og þeir hafi ekki haft hugmynd um hvernig hann bar sig að við það, þó hugbúnaðarmenn væru. Guðni Þór skilur ekki, líkt og Steingrímur Gautur, af hverju málið komi upp núna, notkun scriptunnar hafi verið hætt í síðsumars eftir viðvörun frá GR. Og forritarinn segir mikilvægt að fram komi að enginn hafi hakkað sig inn á Golfbox.

Heiðursmenn í golfi. Forritarinn spyr hvers þeir eiga að gjalda sem eru kannski gengnir til náða fyrir klukkan tíu að kvöldi og hafa ekki yfir sama tölvulæsi og forritarar um þrítugt?Vísir/vilhelm

„Ekki er hægt að skrá rástíma hvenær sem er – eins og aðrir þarf að bíða til 22:00 á kvöldin. Það sem gert var má líkja við að stilla vekjaraklukku til að ýta á takka á fyrirfram ákveðnum tíma Scripta er bara einu skrefi lengra en að vera með stillt á reminder í símanum. Þetta var eingöngu hugsað sem lausn á vandamáli.“

Þá segir Guðni Þór að lausnin hafi gert að verkum að hann var í betri aðstöðu en flestir aðrir til að bóka tíma. En hann hafi einfaldlega notast við þau tól sem hann hafi í sinni verkfærakistu.

Opnar fyrir aðgang að scriptunni

„Sé það vilji golfsamfélagsins þá er ég tilbúinn að hætta notkun scriptunnar (eins og ég hef þegar gert frá og með júlí/ágúst). En betra þykir mér að allir geti haft aðgang að þessum litla forritsbút og gert sitt - þar gæti skapast skemmtileg keppni klukkan 22 öll kvöld frá maí til október. Scriptan er nú aðgengileg fyrir alla sem vilja og því hef ég eða aðrir ekkert forskot lengur - ég er samt ekki að hvetja til notkunar á henni. Allskonar meira sem hægt er að bæta við - randomness á fleiri staði, ekki skrá alltaf sömu 4 einstaklinga í sama holl etc. etc.,“ skrifar Guðni Þór.

Emil Hallfreðsson knattspyrnukappi og Björn Víglundsson formaður GR á teig á Korpu.vísir/vilhelm

Og hér neðar er linkur þar sem nálgast má scriptuna sem hlýtur þá að leiða til þess að GSÍ og golfklúbbarnir verði að taka afstöðu til þess hvernig bregðast skuli við, annað hvort með auknu eftirliti, uppfærslu á bókunarkerfinu eða með öðrum hætti. Eða þá hreinlega að gefa þetta frjálst?

https://github.com/gudnithor4/GolfRegistration

Guðni Þór Björnsson gagnrýnir kerfið sem GSÍ styðst við, segir það lélegt og veltir því upp hvort þar á bæ þurfi menn ekki að fá sér betra kerfi? „Ef það er eitthvað sem þeir vilja athuga þá geta þeir haft samband við mig og ég skal íhuga að aðstoða þá.“


Tengdar fréttir

Til greina kemur að setja kvóta á rástímana

Ásókn í að komast að á golfvelli á höfuðborgarsvæðinu hefur aldrei verið meiri og bitist er um rástímana. Sekúndum eftir að opnað hefur verið fyrir skráningu eru allir tímar bókaðir; ýmsum til mikillar mæðu.

Golffár á Fróni og nú þegar slegist um rástímana

Áhugi á golfinu hefur ekki verið eins mikill í annan tíma á Íslandi. Þó tímabilið sé ekki hafið og nú sé svokallað vetrargolf stundað, sem áður var bara meðal þeirra hörðustu, eru allir rástímar sem í boði eru upp bókaðir og biðlistar í að komast í klúbbana.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×