Tíska og hönnun

Selja góðgerðarboli í fimmta skipti: „Nú er það svart“

Sylvía Rut Sigfúsdóttir skrifar
Konur eru konum bestar verkefnið er árlegt. Elísabet Gunnarsdóttir, Andrea Magnúsdóttir, Aldís Pálsdóttir og Nanna Kristín Tryggvadóttir.
Konur eru konum bestar verkefnið er árlegt. Elísabet Gunnarsdóttir, Andrea Magnúsdóttir, Aldís Pálsdóttir og Nanna Kristín Tryggvadóttir. Aldís Pálsdóttir

Konur eru konum bestar söfnunarátakið er farið af stað en árlega er safnað fyrir mikilvægu málefni tengdu konum.

Elísabet Gunnarsdóttir, Andrea Magnúsdóttir, Aldís Pálsdóttir og Nanna Kristín Tryggvadóttir standa fyrir verkefninu og í ár ætla þær að safna fyrir Stígamótum, ráðgjafar- og fræðslumiðstöð sem vinnur gegn kynferðisofbeldi. 

„Líkt og áður eru skilaboðin Konur eru konum bestar og það eru fullt af konum með okkur í kappliði. Við viljum vera pepparar fyrir hverja aðra í stað þess að draga hvor aðra niður,“ segir Elísabet eigandi Trendnet í samtali við Vísi. Hún er þakklát fyrir meðbyrinn sem verkefnið fær á hverju ári. 

Árið 2017 safnaði hópurinn einni milljón fyrir Kvennaathvarfið. Árið 2018 lögðu þær 1,9 milljónir í menntunarsjóð Mæðrastyrksnefndar og árið 2019 3,7 milljónir til Krafts. Söfnunin stækkar stöðugt því á síðasta ári toppuðu þær sig og styrktu Bjarkarhlíð um 6,8 milljónir. 

Elísabet Gunnars flutti nýlega til Íslands með fjölskyldunni eftir nokkurra ára dvöl erlendis.Aldís Pálsdóttir

„Það er alltaf erfiðast að velja málefni. Það eru svo margir sem við viljum styrkja,“ segir Elísabet. Hún segir að þær hafi átt erfitt með að velja í fyrra en hafi verið einstaklega sáttar með valið. 

„Það hefur verið svo magnað að fylgjast með því sem Bjarkarhlíð hefur verið að gera fyrir þennan styrk. Þetta opnaði líka mikla umræðu og margir hafa stigið fram og sagt frá sinni reynslu.“

Bolurinn í ár er svartur með svörtu letri en eitt B er rautt og áberandi. Yfirskriftin á söfnuninni í ár er Nú er það svart.

„Þetta er svolítið það sem er að gerast í hátískunni núna,“ segir Elísabet um valið að hafa bara svartan bol í ár. Hún segir líka viðeigandi að vera með svartan bol vegna ástandsins í heiminum í augnablikinu. 

„Það virðist engan enda ætla að taka þetta ástand sem við erum í.“

Þær vildu gera bol sem myndi endast vel og vera líka flottur. Því pældu þær mikið í útliti hans, þó markmiðið með bolnum sé að safna fyrir góðu málefni. 

„Það eru margir sem vilja ekki fá jólagjafir og biðja fólk að styrkja góðan málstað í staðinn. Þetta er því fullkomin jólagjöf, því þú hefur bol til að setja í pakkann en styrkir málefni í leiðinni.“

Vegna heimsfaraldurs og samkomutakmarkana verður ekki viðburður í ár heldur aðeins vefsala og er hún nú komin í loftið. Bolirnir verða seldir í takmarkaðan tíma á meðan birgðir endast og verða svo afhentir í desember. Nánari upplýsingar má finna á vefnum Konur eru konum bestar og á Trendnet


Tengdar fréttir

„Konur eru konum bestar“ færðu Krafti 3,7 milljónir

Elísabet Gunnarsdóttir, Andrea Magnúsdóttir, Rakel Tómasdóttir, Nanna Kristín Tryggvadóttir og Aldís Pálsdóttir færðu Huldu Hjálmarsdóttur framkvæmdastjóra Krafts ágóðann af sölu bolanna Konur eru konum bestar.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.