Segist hafa horft á starfs­mann skólans snúa dóttur sína niður

Dóttir Írisar er með ADHD og var oft tekin úr tímum og færð í það sem skólinn kallar sérstakt „hvíldarherbergi". Móðir hennar taldi að þar væri um að ræða notalegan stað þar sem auðvelt væri að slaka á.

Þegar hún var síðan kölluð inn af skólanum í desember í fyrra til að sækja dóttur sína, því henni leið sérstaklega illa þann daginn, blasti við henni önnur sjón.

Hvíldarherbergið frekar eins og fangaklefi

„Þegar ég labba á bak við skápinn þá sé ég aðstoðarskólastjóra halda hurðinni lokaðri. Og ég spyr hvar barnið mitt sé og þá segir hann hérna inni í þessu herbergi . Ég segi ertu til í að hleypa mér inn og fer inn í herbergið og fæ bara nett áfall,“ segir Íris.

Kom nú í ljós að „hvíldarherbergið" svokallaða væri ekki annað en pínulítið herbergi, án loftræstingar með skærri lýsingu og bergmáli.

Þar var hvergi hægt að setjast niður nema á einn grjónapúða sem lá á gólfinu og engir gluggar á herberginu. Sá sem sést á myndunum hér að ofan er nýr og var komið á hurðina eftir umkvartanir Írisar til skólans.

 Íris segir herbergið ekki ósvipað litlum fangaklefa.

„Og henni er haldið lokaðri þar inni. Hún er tekin á höndum og fótum og hent inn í þetta herbergi í brjáluðu skapi þar sem er búið að brjóta á henni," segir Íris.

Hún hafi sest hjá dóttur sinni inni í herberginu á meðan hún var að róa sig niður.

Aðferðir nokkurra skóla við að loka börn með raskanir inn í herbergjum sem þessum eru til skoðunar hjá umboðsmanni alþingis og hafa vakið athygli síðustu vikur:

Klóraði í áttina að starfsmanninum en snerti hann ekki

„Þar er hún bara grátandi og öskrandi og segja hvað væri gert við hana og svoleiðis. En á meðan  það er, þá kemur starfsmaður skólans inn í þetta litla rými og segir við barnið mitt að nú sé hún að ljúga að mér."

Dóttir hennar hafi brugðist illa við þessu og öskrað að starfsmanninum að hún vilji fá að vera ein með mömmu sinni. Hann hafi þá neitað að fara.

„Þá kemur hún svona ögrandi að honum og gerir svona eins og köttur; hvæsir og klórar út í loftið en kemur ekki við hann," segir Íris.

„Þá tekur hann í hendurnar á henni, setur þær fyrir aftan bak og dregur barnið niður þannig að barnið er með andlitið í gólfinu."

Íris hefur kært starfsmanninn til lögreglu. Lögreglustjórinn á Suðurnesjum hefur staðfest við fréttastofu að mál sé í rannsókn þar sem starfsmaður skóla í umdæminu sé „grunaður um að hafa beitt barn ofbeldi".

Hvorki hefur náðst í skólastjóra né aðstoðarskólastjóra Gerðaskóla í dag þrátt fyrir ítrekaðar tilraunir.

Líður mun betur annars staðar

Íris segir dóttur sína nú í meðferð hjá Bugl og að hún hafi nýlega verið greind með depurð og áfallastreituröskun.

Hún er komin í annan skóla þar sem tekið er allt öðruvísi á hennar vanda og líður að eigin sögn mun betur þar.

Þar séu börnin ekki beint þvingunum og aldrei lokuð inni í herbergi þegar þau komast í uppnám.