Hún er dugleg og vinnur mjög markvisst að sínum verkefnum.

„Stundum taka hlutirnir tíma og maður þarf bara að halda út. Það er enginn að fara að rétta þér neitt. Það er enginn að fara að gefa þér neitt. Það þurfa allir að moka sinn skurð.“

Hún segir að því miður átti sig ekki allir á þessu.

„Ég æfði mig inni í stofu alla daga, í tvo klukkutíma eða meira í ógeðslega mörg ár. Um helgar líka, ég vakti allt hverfið klukkan níu á laugardagsmorgni að reyna að syngja Celine Dion. Í dag bý ég náttúrulega að þessu.“

Jóhanna Guðrún ræddi móðurhlutverkið, femínisma, ferilinn, Eurovision ævintýrið, Allir geta dansað, skilnaðinn sinn og margt fleira í hlaðvarpinu Normið. Þátturinn er kominn út á Spotify og helstu hlaðvarpsveitum og má einnig hlusta á hann hér fyrir neðan.

Í lagi að segja nei

Þegar umræðan fer út í móðurhlutverkið segir Jóhanna Guðrún að það sé mikilvægt að finna jafnvægið.

„Það breytist náttúrulega allt þegar þú eignast börn. Auðvitað verður allt skemmtilegra, fallegra og betra en að sama skapi þá þarftu að læra að halda öllum boltunum uppi. Ég er ennþá að læra að drepa mig ekki.“

Jóhanna Guðrún fór of fljótt af stað á fullt í sönginn eftir að hún átti yngra barnið sitt og var mætt upp á svið tíu dögum eftir fæðingu, enn að fá sýklalyf í æð vegna eftirmála fæðingarinnar.

„Þó að þú sért metnaðarfull þá er allt í lagi stundum að taka sér tíma,“ segir Jóhanna Guðrún að hún hafi lært af þessu.

„Að segja nei, að segja þetta er ekki best fyrir mig og þetta er ekki best fyrir barnið mitt.“

Týnir sjálfri sér

„Ég er rosalega tvískipt týpa. Ég nýt þess að vera heima að þrífa og baka með börnin og í kósýgallanum að horfa á mynd áður en ég fer að sofa,“ útskýrir Jóhanna Guðrún.

„Ég elska það en svo finn ég líka að ef ég geri það mjög lengi þá finnst mér ég týna sjálfri mér.“

Söngkonan á sviðinu í síðkjólnum er samt gríðarlega stór hluti af hennar sjálfsmynd.

„Mér finnst ég ekki vera neitt ef ég er ekki að syngja.“

Enginn ætlar að skilja

Jóhanna Guðrún segir að síðustu misseri hafi hún lagt mikla áherslu á slökun. Fyrr á þessu ári gekk hún í gegnum skilnað við barnsföður sinn. 

„Þá svolítið þarf maður með öllu þessu sem fylgir að ákveða hvernig maður ætlar að hafa framhaldið, maður hugsar hlutina upp á nýtt. Þetta eru stórar breytingar. Ég finn að ég get ekki unnið jafn mikið akkúrat núna. Ég þarf að velja mér verkefni.“

Erfiðasta varðandi skilnaðinn er að börnin séu ekki lengur hjá bæði mömmu og pabba.

„Það fer enginn inn í hjónaband með það í huga að ætla að skilja. En helmingur af öllum hjónaböndum í dag endar í skilnaði.“

Nauðsynlegt að kyngja fordómunum

Hún segir að við skilnaðinn verði plönin sem þú hafðir fyrir lífið þitt og sjálfa þig, þau allt í einu verði ekki.

„Hvernig ætla ég að byggja lífið mitt upp aftur? Það er náttúrulega óvissa og óþægindi sem fylgja því.“ Fyrst og fremst á hún við það varðandi börnin.

„Maður þarf að kyngja eigin fordómum gagnvart skilnaði. Ég viðurkenni það sjálf að ég var mjög fordómafull gagnvart skilnuðum af því að ég á foreldra sem hafa verið saman síðan þau voru fimmtán ára.“

Jóhanna Guðrún segir að hún sé á mjög góðum stað núna og einbeiti sér að sér og sinni fjölskyldu. Viðtalið í heild má heyra í spilaranum ofar í fréttinni.