Erlent

Norð­ur-Kór­e­a: Squ­id Game end­ur­spegl­i ógeð­fellt sam­fé­lag Suð­ur-Kór­e­u

Samúel Karl Ólason skrifar
squid-game-netflix-poster
Netflix

Þættirnir Squid Game frá Suður-Kóreu, sem hafa notið gífurlegra vinsælda á Netflix, eru allegóría fyrir ógeðfellt og stéttaskipt samfélag Suður-Kóreu. Það er samkvæmt vefsíðu frá Norður-Kóreu þar sem áróður ríkisstjórnar landsins er birtur.

Í grein á síðunni Arirang Meari.com segir að þættirnir endurspegli raunverulegt samfélag Suður-Kóreu og spillingu þar.

Í mjög stuttu máli sagt og án spennuspilla fjallar Squid Game um fátækt og skuldsett fólk sem er fengið til að taka þátt í hinum ýmsu barnaleikjum þar sem tap þýðir dauði. Markmiðið er að standa einn eftir og vinna fúlgur fjár.

Arirangmeari hefur eftir ónafngreindum sjónvarpsgagnrýnenda í Suður-Kóreu að þættirnir sýni ójafnt samfélag þar sem ríkt fólk komi fram við fátækt fólk eins og peð.

„Sagt er að vegna þáttanna átti fólki sig á raunveruleika skepnulegs samfélags Suður-Kóreu þar sem mannverur eru drifnar áfram í öfgafullri samkeppni og manneðli þeirra þurrkað út,“ segir í greininni, samkvæmt frétt Reuters.

Ríkisstjórn Kim Jong Un hefur að undanförnu beitt sér harkalega gegn íbúum Norður-Kóreu sem hafa horft á afþreyingarefni frá Suður-Kóreu og öðrum ríkjum.

Sjá einnig: Fangelsi og jafnvel dauðadómur fyrir vörslu erlends afþreyingarefnis

Arirang Meari eru reglulega notuð til að gagnrýna menningu í Suður-Kóreu, samkvæmt Reuters. Fyrr á þessu ári var síðunni beitt gegn K-pop. Þá var því haldið fram að poppstjörnur Suður-Kóreu væru þrælar stórfyrirtækja og lifðu ömurlegu lífi.

Þá var því haldið fram á miðlinum í fyrra að myndin Parasite væri meistaraverk sem varpaði ljósi á raunverulega stéttaskiptingu í Suður-Kóreu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.