Sýndu unga Anníe Mist kynna sig til leiks á fyrstu heimsleikunum

Óskar Ófeigur Jónsson skrifar 12. október 2021 08:30

Anníe Mist fagnar í einu af sex skiptum þar sem hún hefur komist á verðlaunapall á heimsleikunum. Instagram/@anniethorisdottir

Þrettán ára CrossFit ævi íslenskrar goðsagnar var gerð upp á skemmtilegan hátt sem auglýsing fyrir eitt stærsta CrossFit mót ársins.

Anníe Mist Þórisdóttir er önnur hraustasta CrossFit kona heims árið 2021 eftir frábæra frammistöðu sína á heimsleikunum í ágústbyrjun. Næst á dagskrá er Rogue Invitational mótið og mótshaldarar heiðra íslensku goðsögnina með skemmtilegu myndbandi á miðlum sínum.

Forráðamenn Rogue Invitational auglýsa mótið sitt seinna í þessum október með því að fara yfir feril Anníe Mistar í myndbandi þar sem teknar hafa verið stutt myndbrot frá ferli hennar. Þar má sjá Anníe taka vel á því en um leið er alltaf stutt í brosið.

Myndbandið hefst árið 2009 þegar hún kynnir sig til leiks á sínum fyrstu heimsleikum.

Það vissi enginn þá en að þar færi verðandi heimsmeistari í CrossFit, sexfaldur verðlaunahafi og ein vinsælasta og besta CrossFit kona sögunnar.

„Alltaf meðal þeirra vinsælustu í íþróttinni og Anníe Þórisdóttir er kraftmikil keppniskona sem er innblástur fyrir alla, bæði áhugafólk og keppnisfólk. Eftir að hafa tekið sér ársfrí til að eignast sitt fyrsta barn þá átti hún hjartnæma endurkomu í ár sem endaði með því að hún komst á pall á heimsleikunum,“ sagði í umfjöllun um Anníe.

Með fylgir myndband með svipmyndum frá ferli hennar í CrossFit og þar má sjá vel sjá útgeislun og keppnisgleði okkar konu sem heilla alla sem á horfa á þessum mótið. Myndbandið er hér fyrir neðan.