Veður

Skúrir eða slyddu­él í flestum lands­hlutum

Atli Ísleifsson skrifar
Ferðamenn við Hallgrímskirkju. Hiti á landinu í dag verður á bilinu tvö til átta stig.
Ferðamenn við Hallgrímskirkju. Hiti á landinu í dag verður á bilinu tvö til átta stig. Vísir/Vilhelm

Lægðin sem olli óveðri á landinu í gær er nú komin austur fyrir Jan Mayen, en nú í morgunsárið mælist enn hvassviðri úti við norðausturströndina. Þar dregur úr vindi á næstu klukkustundum.

Á vef Veðurstofunnar segir að í dag sé útlit fyrir vestlæga átt, yfirleitt á bilinu átta til þrettán metra á sekúndu. Skúrir eða slydduél í flestum landshlutum og vindur geti aukist tímabundið meðan á hryðjunum standi. Hiti á landinu verður á bilinu tvö til átta stig í dag.

„Í kvöld lægir og léttir til á sunnan- og vestanverðu landinu og kólnar allvíða niður að frostmarki og þá getur myndast hálka á vegum. Það eru jafndægur á hausti í dag og kominn sá tími þegar vera þarf á varðbergi gagnvart hálku.

Á morgun nálgast lægð úr suðvestri og fer miðja hennar yfir landið. Þá má búast við austlægri og síðar breytilegri átt 5-13 m/s með rigningu. Á Norður- og Austurlandi verður þurrt þangað til síðdegis, en þá fer einnig að rigna þar og slydda á heiðum. Hiti 2 til 9 stig, mildast við suðurströndina.

Dregur síðan úr vindi og úrkomu á föstudag. Á laugardag nálgast síðan enn ein lægðin, og má því gera ráð fyrir að kosningadagurinn verði vinda- og vætusamur,“ segir á vef Veðurstofunnar.

Spákortið fyrir klukkan 14 í dag.Veðurstofan

Veðurhorfur á landinu næstu daga

Á fimmtudag: Austlæg og síðar breytileg átt 5-13 m/s og rigning, en þurrt á Norður- og Austurlandi þangað til síðdegis. Slydda á heiðum á norðanverðu landinu. Hiti 2 til 9 stig, mildast við suðurströndina.

Á föstudag: Austlæg eða breytileg átt 3-10. Skýjað og lítilsháttar væta í flestum landshlutum. Hiti breytist lítið.

Á laugardag: Austan 10-18 og víða rigning, en slydda á heiðum norðantil á landinu. Hiti 2 til 10 stig, hlýjast á Suðurlandi.

Á sunnudag: Stíf suðaustan- og austanátt. Rigning suðaustanlands, en lítilsháttar væta um landið vestan- og norðanvert. Hiti 8 til 16 stig, hlýjast á Suðvesturlandi.

Á mánudag og þriðjudag: Útlit fyrir austlæga átt. Væta af og til á austanverðu landinu. Þurrt og bjart með köflum vestantil og hlýtt þar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.