Þrír réðust á einn og rændu hann

Samúel Karl Ólason skrifar 5. september 2021 07:17

Lögreglan virðist hafa haft í nógu að snúast í nótt. Vísir/Vilhelm

Lögreglunni á höfuðborgarsvæðinu barst í nótt tilkynning um rán í miðbænum. Þrír einstaklingar réðust þar á mann, veittu honum áverka og rændu hann. Í dagbók lögreglu segir að málið sé til rannsóknar.

Skömmu fyrir miðnætti barst tilkynning um líkamsárás á skemmtistað í miðbænum. Þar var einn handtekinn og vistaður í fangaklefa í þágu rannsóknar málsins. Samkvæmt heimildum fréttastofu er um hnífstungu að ræða.

Í gær var óskað eftir aðstoð lögreglu vegna einstaklings sem var til vandræða í Hlemmi Mathöll. Þá barst einnig tilkynning um ölvaðan mann sem var að trufla umferð í Breiðholti með því að ganga fyrir bíla og reyna að komast inn í þá. Einnig var óskað eftir aðstoð lögreglu vegna manna sem voru að slást í samkvæmi.

Þar að auki var lögregla kölluð til vegna einstaklings sem var til vandræða á Bráðamóttöku í Fossvogi.

Mikið virðist hafa verið um stúta í umferðinni í nótt en í dagbók lögreglu kemur fram að fjölmargir ökumenn voru stöðvaðir fyrir akstur undir áhrifum áfengis og/eða fíkniefna. Minnst einn þeirra reyndist þegar hafa verið sviptur ökuréttindum.

Þá var einn ökumaður á ótryggðum bíl og er sömuleiðis grunaður um brot á vopnalögum.

Lögreglumál Næturlíf Reykjavík

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.