Innlent

Þessi flugvél gæti orðið sú fyrsta rafknúna í íslensku atvinnuflugi

Kristján Már Unnarsson skrifar
Hin tveggja sæta eFlyer 2 flaug sitt fyrsta flug í apríl 2018. Bye Aerospace vonast til að flugvélin verði komin með flughæfisskírteini síðla árs 2022 eða snemma árs 2023.
Hin tveggja sæta eFlyer 2 flaug sitt fyrsta flug í apríl 2018. Bye Aerospace vonast til að flugvélin verði komin með flughæfisskírteini síðla árs 2022 eða snemma árs 2023. Bye Aerospace

Flugskóli Reykjavíkur hefur samið um kaup á þremur eFlyer-kennsluflugvélum sem knúnar eru rafmagni. Áætlað er að þær verði afhentar skólanum eftir tvö til þrjú ár og gætu þær þá orðið fyrstu rafmagnsflugvélarnar í atvinnuflugi hérlendis.

„Fjárfesting í rafmagnsflugvélum til kennslu er stórt skref, bæði í sögu flugs á Íslandi almennt og í þeim orkuskiptum sem nú eiga sér stað,“ segir Hjörvar Hans Bragason, skólastjóri flugskólans, í fréttatilkynningu. Þetta verði í fyrsta sinn sem nemendum bjóðist kennsla á flugvélum sem gangi eingöngu fyrir rafmagni.

Hjörvar Hans Bragason, skólastjóri Flugskóla Reykjavíkur. Skólinn er staðsettur í Fluggörðum á Reykjavíkurflugvelli.Flugskóli Reykjavíkur

Flugvélarnar eru framleiddar af Bye Aerospace í Bandaríkjunum. Tvær vélanna eru tveggja sæta af gerðinni eFlyer 2 og ein fjögurra sæta af gerðinni eFlyer 4. Að auki segir flugskólinn að viðræður standi yfir um kauprétt á tveimur flugvélum til viðbótar.

Stutt er síðan þróun rafmagnsflugvéla hófst fyrir alvöru og hefur takmarkað flugþol verið helsti flöskuháls í framleiðslu þeirra. Flugskóli Reykjavíkur segir Bye Aerospace hafa með hönnun sinni tekið forystu á þessum markaði með því að bjóða þriggja klukkustunda flugþol. Það sé langt umfram helstu keppinauta. Árangur Bye Aerospace hafi hlotið mikla athygli og hundruð pantana borist í vélar þeirra.

Fjögurra sæta vélin eFlyer 4. Hún er enn á þróunarstigi. Framleiðandinn stefnir að því að hún fái flughæfisskírteini síðla árs 2023 eða snemma árs 2024. Farflugshraði hennar verður um 300 kílómetrar á klukkustund.Bye Aerospace

Mikið hagræði felist í notkun rafmagnsflugvéla þar sem rafmótorar geti skilað hlutfallslega miklu afli. Hreyfill eFlyer 2 muni til dæmis skila 40-50% meira en brunahreyfill í svipuðum flokki, segir í frétt flugskólans. Það hafi í för með sér umtalsverðan sparnað í rekstrarkostnaði, sem áætlað er að verði aðeins um 20% af rekstri sambærilegra flugvéla með hefðbundnum eldsneytishreyfli.

Umhverfisáhrifin séu augljóslega afar jákvæð. Kolefnisfótspor við notkun nýju kennsluvélanna verði ekkert og hljóðspor nánast ógreinanlegt, segir ennfremur.

Farflugshraði tveggja sæta vélarinnar er um 250 kílómetrar á klukkustund. Hreyfillinn er frá Siemens.Bye Aerospace

Fram kemur að vélarnar verði búnar fallhlífum. Það sé nýjung sem staðalbúnaður kennsluvéla og auki öryggi nemenda til muna.

Flugskóli Reykjavíkur var stofnaður árið 2019 og hefur lagt áherslu á kennslu til einkaflugmannsprófs. Starfsemi flugskólans fer fram frá Fluggörðum á Reykjavíkurflugvelli þar sem fimm kennsluvélar hans eru staðsettar.

Fréttir af flugi Loftslagsmál Umhverfismál Orkumál Skóla - og menntamál

Tengdar fréttir

Flugvélin sem gæti orðið sú fyrsta rafknúna hjá Icelandair

Ráðamenn Icelandair telja að vetnis- og rafmagnsflugvélar geti orðið raunhæfur kostur í innanlandsfluginu á fáum árum og hafa skrifað undir tvær viljayfirlýsingar við erlend fyrirtæki með það að markmiði að verða á meðal fyrstu flugfélaga heims til að gera innanlandsflug kolefnislaust.

Norskt flugfélag stefnir á rafknúið flug eftir fimm ár

Norska flugfélagið Widerøe, stærsta innanlandsflugfélag Skandinavíu, hefur tekið höndum saman við breska Rolls-Royce hreyflaframleiðandann og ítölsku flugvélaverksmiðjuna Tecnam um að koma rafknúinni flugvél í farþegaflug árið 2026. Verkefnið útvíkkar rannsóknaráætlun Rolls-Royce og Widerøe um sjálfbært flug og núverandi samstarf Rolls-Royce og Tecnam um P-Volt rafmagnsflugvélina.

Kostnaður við innanlandsflug geti lækkað um allt að 80%

Kostnaður við innanlandsflug gæti lækkað um allt að áttatíu prósent eftir orkuskipti að sögn varaformanns umhverfis- og samgöngunefndar Alþingis. Nefndin hefur lagt fram þingsályktunartillögu þar sem sett er fram það markmið að byrjað verði að nota umhverfisvæna orkugjafa í innanlandsflugi innan tíu ára.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið