Innlent

„Þetta kom aldrei inn á borð til stjórnar“

Elma Rut Valtýsdóttir og Elísabet Inga Sigurðardóttir skrifa
Borghildur Sigurðardóttir er annar varaformaður Knattspyrnusambands Íslands.
Borghildur Sigurðardóttir er annar varaformaður Knattspyrnusambands Íslands. Vísir

Borghildur Sigurðardóttir, annar varaformaður Knattspyrnusambands Íslands, segir þau mál sem snúa að meintum kynferðisbrotum landsliðsmanna aldrei hafa komið inn á borð stjórnarinnar.

Í viðtali við fréttastofu var Borghildur spurð hvers vegna stjórnin skuli vera að bregðast við fyrst núna.

„Einfaldlega vegna þess að það koma fram greinar sem að segja frá atvikum sem að bara hreinlega hafa aldrei ratað inn á borð stjórnar og við vorum bara á engan hátt meðvituð um, sem er alveg svakalega erfitt. Það verður að bregðast við. Við ætlum ekki að standa í því að vera að þagga niður svona hluti, en því miður þá bara hafði stjórn ekki upplýsingar um tiltekið málefni.“

Hér má sjá viðtalið við Borghildi í heild sinni.

Þá segir Borghildur að stjórnin hafi ekki búið yfir upplýsingum um það mál sem kona greindi frá í viðtali fyrr í vikunni þar sem hún sagði frá ofbeldisbroti leikmanns landsliðsins.

Eins og fram hefur komið sagði Guðni Bergsson af sér sem formaður Knattspyrnusambandsins fyrr í dag.

En vissi formaðurinn þá einn af þessu?

„Nei það var náttúrlega sendur póstur á fleiri aðila, en eina sem ég get sagt er að þetta kom aldrei til umræðu á stjórnarfundi. Við fengum ekki upplýsingar. Ég sá umræddan póst fyrst í gær. Það er bara staðan.“

Borghildur segir að vissulega sé það óeðlilegt að formaður upplýsi stjórn ekki um mál af þessum toga en hafa beri í huga að þessi mál séu flókin og erfið.

Guðni Bergsson hefur verið formaður KSÍ frá árinu 2017. Hann stígur nú til hliðar. Vísir/Daníel Þór

„Það eru ofboðslega margir hlutir sem spila inn í en það er að mínu mati nauðsynlegt að það séu upplýsingar. Þær þurfa ekki að vera með smáatriðum eða nöfnum eða því um líku, en að sjálfsögðu eiga allir að vita um svona alvarleg málefni.“

Hún segir sambandinu ekki hafa borist margar óformlegar ábendingar um kynferðisbrot eða ofbeldi.

„En hins vegar viljum við hvetja þolendur að koma til okkar og segja okkur frá, því að við getum ekki brugðist við eða breytt neinu þegar við vitum ekki.“

Segir alla stjórnarmeðlimi hafa íhugað afsögn

Sjálf segist Borghildur hafa íhugað að segja af sér. Allir sitjandi stjórnarmeðlimir hafi boðið fram afsögn. Lausnin sé hins vegar ekki fólgin í því að stíga frá málinu og skilja sambandið eftir óstarfhæft.

„Þetta er stór hreyfing og það er margt, margt annað í gangi heldur en þessi ömurlegu mál sem eru núna, en við þurfum að fylgja því ferli og við þurfum að geta haft hér starfsemi,“ segir Borghildur.

„Við verðum að gera þetta af alvöru og við getum ekki bara lagt upp lappirnar og tekið enga ábyrgð og komið ekki neinu í framkvæmd. Það myndi ekki skila neinu.“

Kolbrún Hrund Sigurgeirsdóttir, verkefnastýra Jafnréttisskóla Reykjavíkurborgar.Vísir

Stjórnin er um þessar mundir að stofna starfshóp sem vinnur að jafnréttismálum. Það er Kolbrún Hrund Sigurgeirsdóttir, verkefnisstýra jafnréttismála á skóla- og frístundasviði Reykjavíkur, sem leiðir hópinn og mun það koma í hennar hlut að ráða inn fleiri aðila í hópinn.

„Þetta verður ekki á okkar vegum, þannig að við séum að sitja fundi eða gera nokkurn skapaðan hlut. En við þurfum einfaldlega að fá hóp til þess að geta tekið þátt í því að útrýma kynbundnu ofbeldi og öllu ofbeldi, hvort sem það beinist gagnvart konum eða öðrum minnihlutahópum. Við bara verðum að gera þetta.“

Elísabet Inga Sigurðardóttir ræddi einnig við Gísla Gíslason, hinn varaformann KSÍ, að loknum fundi.

Hér að neðan má svo sjá viðtal Elísabetar við Klöru Bjartmarz, framkvæmdastjóra KSÍ.


Tengdar fréttir

Kolbeinn og Rúnar Már ekki með í komandi landsliðsverkefni

Tveir leikmenn sem voru í upphaflegum landsliðshóp Íslands fyrir komandi verkefni í undankeppni HM verða ekki með í verkefninu sem hefst eftir tvo daga. Annar hefur verið tekinn úr hópnum en hinn mun hafa dregið sig sjálfur úr hópnum.

Tveir leikmenn munu ekki spila gegn Rúmeníu

Tveir leikmenn sem valdir voru í landsliðshópinn fyrir komandi landsleiki í undankeppni HM 2022 í fótbolta verða ekki með í næsta verkefni. Annar hefur verið tekinn úr hópnum en hinn mun hafa dregið sig sjálfur úr hópnum.

Guðni Bergsson segir af sér

Guðni Bergsson hefur sagt starfi sínu sem formaður KSÍ lausu. Hann var kosinn formaður fyrst árið 2017.

KSÍ muni biðjast afsökunar

Klara Bjartmarz, framkvæmdarstjóri KSÍ, segir sambandið munu biðja þolendur kynferðisofbeldis afsökunar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.