Erlent

Rekin af Ólympíuleikunum fyrir að slá hest

Samúel Karl Ólason skrifar
Annika Schleu á baki Saint Boy í Tókýó í gær.
Annika Schleu á baki Saint Boy í Tókýó í gær. Getty/Dan Mullan

Þýskur fimmtarþrautarþjálfari hefur verið rekinn af Ólympíuleikunum í Tókýó fyrir að slá hest. Kim Raisner, þjálfarinn sem um ræðir, var að reyna að aðstoða íþróttakonuna Anniku Schleu við að ná stjórn á hestinum Soint Boy í miðri keppni í gær.

Íþróttamenn í nútíma fimmtarþraut keppa í skylmingum, sundi, skotfimi, hlaupum og hindrunarhlaupi á hestbaki.

Keppendur í nútíma fimmtarþraut fá einungis tuttugu mínútur til að mynda tengsl með ókunnugum hestum fyrir hindrunarhlaupið. Í gær var Schleu að keppa í stökki og náði hún ekki stjórn á Saint Boy. Þegar hún kom á brautina á baki hestsins var hún grátandi og gat hún ekki farið brautina.

Samkvæmt BBC heyrðist Raisner í sjónvarpsútsendingu kalla á Schleu að hún ætti að berja hestinn fastar.

Í frétt Guardian segir að þá hafi vaknað spurningar um það hvernig Schleu og Raisner hefðu komið fram við hestinn.

Rannsókn hófst og var meðal annars skoðað myndefni en samkvæmt tilkynningu frá nefnd sem stýrir fimmtarþraut á heimsvísu sýni það Raisner slá Saint Boy. Hegðun hennar þykir brot á reglum fimmtarþrautar og var henni gert að yfirgefa ólympíuleikvanginn.

Fyrir hindrunarhlaupið var Schleu í forystu í fimmtarþrautinni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.