Innlent

Vilja skýra sýn um framhald aðgerða

Berghildur Erla Bernharðsdóttir skrifar

Stjórnarandstaðan gagnrýnir ríkisstjórnina fyrir stefnuleysi í sóttvarnaaðgerðum og vill fá skýrari sýn. Margir segjast hafa komið fram efasemdum um rýmkun reglna á landamærum þann 1. júlí.

Meirihluti stjórnarandstöðunnar segir að of bratt hafi verið farið með að rýmka reglur á landamærum þann 1. júlí en þær reglur áttu að gilda til 15. ágúst. Nýjar reglur tóku hins vegar gildi í dag vegna stöðu kórónuveirufaraldursins í landinu. 

Björn Leví Gunnarsson þingmaður Pírata segir að flokkurinn hafi frá því kórónuveirufaraldurinn hófst bent á mikilvægi þess að hafa takmarkanir á landamærum meðan faraldurinn geysar í heiminum. 

„ Eina leiðin til að koma í veg fyrir endurteknar bylgjur innanlands eru takmarkanir á landamærum,“ segir Björn.

Hann segir að meðan ekki sé búið að bólusetja alla geti ríkisstjórnin ekki stólað á að ferðaþjónustan rétti úr kútnum.

„Við þurfum að horfa til annarra greina eins og á nýsköpun og höfum bent á mánuðum saman að við eigum núna að nýta tímann ogbyggja upp nýsköpun hér á landi,“ segir Björn. 

Logi Már Einarsson formaður Samfylkingarinnar segist hafa haft efasemdir um rýmkun reglna á landamærum þann 1. júlí.

„Maður fann það á sóttvarnayfirvöldum að þeim fannst þetta fulllangt gengið og við sjáum í löndum í kringum okkur að þau voru að gera meiri kröfur,“ segir Logi.

Inga Sæland formaður Flokks fólksins segist ítrekað hafa bent á það í ræðustól Alþingis að landið eigi að vera lokað meðan heimsfaraldur geisar. 

„Það er eins og þau ætli aldrei að læra að veiran er að koma inn um landamærin. Ríkisstjórnin er búin að setja þjóðina að veði og nú sitjum við í súpunni,“ segir Inga. 

Gunnar Smári Egilsson framkvæmdastjóri þingflokks Sósíalistaflokksins hyggur á framboð í næstu þingkosningum. Hann telur að ríkisstjórnin hafi tekið afar rangar ákvarðanir varðandi landamærin. 

„ Þetta er áfellisdómur yfir þeirri stefnu sem ríkisstjórnin hefur rekið sem hefur öll snúist um það að opna landamærin.  Það er að koma í ljós að sú leið var aldei fær. Ég hef farið fram á það að ríkisstjórnin biðjist  afsökunar vegna stöðunnar í dag. Almenningur vill fyrst og fremst fá veirufrítt Ísland,“ segir Gunnar.  

Bergþór Ólason varaformaður Miðflokksins telur að ríkisstjórnin hafi ekki verið nægjanlega á varðbergi með að veiran gæti aftur farið á flug. 

„1. júlí átti allt að vera orðið hreint og flæðið óheft nú er stigið til baka og það voru engar meldingar um að svo gæti farið sem kemur sér afar illa fyrir ferðaþjónustuna sem er kannski búin að ráða mikinn mannskap og fleira,“ segir Bergþór. 

Kallað er eftir skýrari sýn stjórnvalda um næstu skref.

Björn Leví telur næstu skref afar óljós.

„Það vantar alla stefnumótun hjá stjórnvöldum,“ segir Björn. 

„Við þurfum þá bara að koma okkur inn á nýtt stig í þessari baráttu og miða aðgerðir við þennan nýja veruleika,“ segir Logi Már Einarsson. 

„Það kemur á óvart hversu markmið ríkisstjórnarinnar eru óljós. Skilaboðin óskýr. Mér finnst þau skref sem ríkisstjórnin hefur verið að taka núna óljós. Ráðherrar ríkisstjórnarinnar töluðu með þeim hætti þegar reglur á landamærum voru rýmkaðar að allt væri búið. Þau voru komin í kosningaham og fyrir vikið misstu þau augun af boltanum.  Mér finnst þau skref sem ríkisstjórnin hefur verið að taka núna óljós og ekki til að auka samstöðu eða skilning fólks,“ segir Þorgerður Katrín Gunnarsdóttir formaður Viðreisnar. 

„Þetta virðist einhvern veginn allt saman vera tiltölulega handahófskennt enn þá,“ segir Bergþór Ólason varaformaður Miðflokksins. 


Tengdar fréttir

„Þessar að­gerðir leggjast bara mjög illa í okkur“

Fjármála- og efnahagsráðherra telur enn ótímabært að segja að efnahagslegt bakslag muni hljótast af nýjum sóttvarnaaðgerðum. Veitingamenn og kráareigendur eru ósáttir að gripið hafi verið til nýrra aðgerða. Það sé mikið högg fyrir reksturinn.

Hólfaskipting snýr aftur á fótboltavellina

Ríkisstjórn Vinstri grænna, Sjálfstæðisflokks og Framsóknarflokks tilkynnti í dag um nýjar sóttvarnaraðgerðir vegna bylgju kórónuveirufaraldursins sem borið hefur á undanfarna daga. Íþróttaviðburðir eru þar ekki undanskildir nýjum reglum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.