Viðskipti innlent

Vatnsforði Þórisvatns aldrei mælst minni á miðju sumri

Kristján Már Unnarsson skrifar
Frá Þórisvatni. Vatnajökull í baksýn.
Frá Þórisvatni. Vatnajökull í baksýn. Arnar Halldórsson

Vatnshæð Þórisvatns hefur aldrei mælst lægri um þetta leyti árs frá því farið var að nýta vatnið sem helsta vatnsforðabúr þjóðarinnar og er yfirborð þess núna sjö metrum lægra en í meðalári. Talsmaður Landsvirkjunar segir þó enga ástæðu til að óttast raforkuskort í vetur.

Þórisvatn er aðalmiðlunarlón virkjana Landsvirkjunar á Þjórsár- og Tungnaársvæðinu. Vatnið virkar þannig í raun sem stærsti rafgeymir landsins.

Ragnhildur Sverrisdóttir, upplýsingafulltrúi Landsvirkjunar.Kristinn Guðmundsson

„Það hefur aldrei verið minna í Þórisvatni. Það stendur illa, getur maður sagt, innan gæsalappa, nema hvað við missum engan svefn yfir því,“ segir Ragnhildur Sverrisdóttir, upplýsingafulltrúi Landsvirkjunar, í fréttum Stöðvar 2.

Rauða línan efst á grafinu hér fyrir neðan sýnir hvenær Þórisvatn fer á yfirfall en það er í 579 metra hæð yfir sjávarmáli. Bláa svæðið táknar lægstu og hæstu gildi fram til þessa. Gula línan er áætlað meðaltal vatnshæðar, bláa línan síðasta vatnsár og fjólubláa línan núverandi vatnsár. 

Vatnshæðin stendur núna í 569 metrum yfir sjávarmáli, sjö metrum lægra miðað við 576 metra hæð í meðalári um miðjan júlímánuð.

Vatnshæð Þórisvatns. Hringurinn á grafinu til hægri sýnir hvar línan fyrir núverandi vatnsár er komin niður fyrir lægsta gildi sem áður hefur mælst.Landsvirkjun

Frá því seinnipartinn í júní hefur vatnshæðin verið fyrir neðan lægstu stöðu sem áður hefur mælst. Landsvirkjunarmenn segja að veðráttan ráði mestu um vatnsbúskapinn, þættir eins og bráðnun jökla, vorflóð og úrkoma.

„Vorið var kalt og þurrt. Þannig að það hefur fyllst hægar en við reiknuðum með og gerist í meðalári.

Hins vegar Hágöngulón er að fyllast. Það eru tveir metrar í að það fari að flæða úr Hágöngulóni í Þórisvatn. Svo þetta horfir allt til betri vegar.“

Manngert útfall Þórisvatns við Vatnsfell. Þaðan er vatninu miðlað til virkjana Landsvirkjunar á Þjórsár- og Tungnaársvæðinu.Arnar Halldórsson

Ragnhildur segir önnur helstu lón Landsvirkjunar, Hálslón og Blöndulón, standa mun betur en vatnshæð þeirra er núna nálægt meðaltali.

Úr Þórisvatni er hins vegar miðlað til sjö virkjana sem samtals standa undir um helmingi af raforkuframleiðslu Landsvirkjunar og upp undir þrjátíu milljarða króna árlegum sölutekjum raforku. En er ástæða til að óttast vandræði eins og raforkuskort í vetur?

„Við höfum enga trú á því að við lendum í neinum vandræðum. Við reiknum með að öll lón fyllist vel. Og þetta muni ekki hafa nein áhrif á raforkuvinnsluna hjá okkur,“ svarar upplýsingafulltrúi Landsvirkjunar.

Hér má sjá frétt Stöðvar 2:


Tengdar fréttir





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
SKEL
0,79
3
5.009
REGINN
0,56
4
29.667
BRIM
0
3
7.745
REITIR
0
5
127.866
ICESEA
0
4
34.608

Mesta lækkun dagsins


Félag
Br.%
Fjöldi
Velta*
MAREL
-2
39
410.110
KVIKA
-1,75
19
239.441
SJOVA
-1,68
20
118.924
ISB
-1,36
45
150.563
ARION
-1,22
42
847.531
Velkomin á Vísi. Þessi vefur notar vafrakökur. Sjá nánar.