Gríðarlegir vatnavextir valda vegaskemmdum á Norðurlandi

Gunnar Reynir Valþórsson skrifar 1. júlí 2021 06:41

Gríðarlegir vatnavextir á norðanverðu landinu hafa víða gert skráveifu í vegakerfinu. Illugastaðavegur í Fjóskadal er farinn í sundur á um tveggja kílómetra kafla innan við Illugastaði og Eyjafjarðarbraut eystri er farin í sundur við Þverá.

Þá segir á heimasíðu Vegagerðarinnar í morgun að Finnastaðavegur sé við það að fara í sundur við Finnastaðaá og í Ljósavatnsskarði hefur umferðarhraðinn verið tekinn niður í þrjátíu metra á klukkustund þar sem vatn er farið að flæða inn á veginn vegna mikilla vatnavaxta í Ljósavatni.

Vegagerðin segist búast við því að frekari skemmdir komi í ljós nú í morgunsárið og eru ökumenn beðnir um að aka varlega og tilkynna strax um óeðlileg frávik eða vatnavexti í síma 1777.

Lögreglan á Norðurlandi eystra bað fólk á svæðinu í gærkvöldi um að vera ekki á ferðinni á þjóðvegum að óþörfu vegna vatnavaxtanna og íbúar á Akureyri voru beðnir um að vera ekki á ferðinni á göngustígum og lægðum í grennd við Glerá sem var orðin gríðarlega vatnsmikil í gær.

Þá var ákveðið í gær að loka brúnum við Þverá í Eyjafirði og einnig við Möðruvelli, þar sem Eyjafjarðrarbraut eystri og vestri mætast.

Veðurstofan spáin áframhaldandi leysingum í hlýindunum á norðan- og austanverðu landinu. Má því búast við auknu vatnsrennsli og hækkun vatnsborðs í ám og lækjum, sér í lagi þar sem hlýtt er í veðri og snjór til fjalla.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.