Lof og last: Reynsla Víkinga, mið­varðar­par KR, Kórinn, varnar­leikur Kefla­víkur og and­­leysi Garð­bæinga

Taka skal fram að þetta er eingöngu skoðun blaðamanns og er aðallega gert til skemmtunar.

Lof

Reynsla og varnarleikur Víkings

Í upphafi síðasta tímabils töpuðu Víkingar 1-0 gegn KR í Meistarakeppni KSÍ. Eftir leik sagði Arnar Gunnlaugsson, þjálfari Víkinga, að lið hans þyrfti að læra hvernig ætti að sigla sigrum heim. Hann var sáttur með spilamennsku Víkinga þann daginn en fannst vanta herslumuninn.

Téðan herslumun vantaði oftar en ekki á síðustu leiktíð er Víkingum gekk skelfilega að sigla þremur stigum í hús. Annað hefur verið upp á teningnum í sumar og eftir 1-0 sigur á KA eru Víkingar komnir með fjóra sigra og eitt jafntefli að loknum fimm leikjum. Þá hefur liðið aðeins fengið á sig þrjú mörk.

Víkingar hafa þar með unnið fleiri leiki en þeir gerðu allt síðasta tímabil.

Spilamennska Breiðabliks

Breiðablik vann einkar sannfærandi 4-0 sigur á nágrönnum sínum og fjendum í Stjörnunni á föstudagskvöld. Leikurinn var nokkuð jafn í upphafi en heimamenn tóku öll völd á vellinum þegar leið á fyrri hálfleik og í síðari hálfleik var í raun aðeins eitt lið á vellinum.

Blikar nú unnið tvo leiki í röð á heimavelli 4-0 og mögulega er að birta til yfir Kópavogi, allavega Smáranum. Hvað varðar frammistöðu Stjörnunnar þá verður hún rædd hér að neðan.

Miðvarðarpar KR

Arnór Sveinn Aðalsteinsson fór meiddur af velli í 2-3 tapi KR gegn Val á dögunum. Finnur Tómas Pálmason kom því inn í liðið með Grétari Snæ Gunnarssyni fyrir leik liðsins gegn FH á laugardag en þeir áttu erfitt uppdráttar í Valsleiknum.

Það var því búist við því að Matthías Vilhjálmsson, Jónatan Ingi Jónsson, Steven Lennon, Ágúst Eðvald Hlynsson eða Þórir Jóhann Helgason myndu valda þeim einhverjum vandræðum.

Annað kom á daginn, KR vann þægilegan 2-0 sigur og miðverðirnir hafa varla þurft að þvo búninga sína að leik loknum.

Last

Kórinn

Heimavöllur HK hefur ekki verið gjöfull það sem af er leiktíð. Liðið tapaði 3-1 fyrir ÍA á föstudaginn og eftir fjóra heimaleiki hefur liðið aðeins nælt í tvö stig. Flestir fjölmiðlar og sparkspekingar spáðu HK sama sæti og liðið hefur lent í undanfarin tvö ár, því níunda.

Nú virðist hins vegar sem liðið geti í raun og veru fallið en það hefur lítið sem ekkert gengið upp hjá HK-ingum í upphafi móts. Ef liðið ætlar að halda sæti sínu í Pepsi Max-deildinni þarf það að gjöra svo vel og fara vinna heimaleiki.

Stjarnan

Andleysi Garðbæinga á Kópavogsvelli er illskiljanlegt og ekki boðlegt. Það virðist sem leikmenn Stjörnunnar hafi tekið brotthvarfi Rúnars Páls Sigmundssonar verr en búist var við. Það hefur bókstaflega ekkert gengið upp hjá liðinu til þessa og segja má að liðið hafi náð botninum með 4-0 tapinu á Kópavogsvelli.

Nú hlýtur eina leiðin að vera upp og liðið fær gullið tækifæri til að koma sér aftur á beinu brautina þegar KA kemur í heimsókn í Garðabæinn í kvöld.

Varnarleikur Keflavíkur

Nýliðar Keflavíkur þurfa að fara múra fyrir mark sitt ef þeir ætla sér ekki beinustu leið niður í Lengjudeildina á nýjan leik. Liðið tapaði 4-2 gegn Fylki á föstudagskvöld og hefur nú fengið á sig 12 mörk í síðustu þremur leikjum.

Eftir naumt tap gegn Víking og sigur á Stjörnunni í fyrstu tveimur umferðum hefur heldur betur farið að halla undan fæti og Keflvíkingar þurfa að bregðast við sem fyrst. Þeir fá Val í heimsókn í kvöld og þurfa að sýna betri frammistöðu þar en í undanförnum leikjum ætli þeir ekki að fá á sig fjögur mörk fjórða leikinn í röð.

Hallgrímur Mar Steingrímsson

Í raun erfitt að setja Hallgrím Mar hér undir last eftir frábæra byrjun á tímabilinu. Hann brenndi hins vegar af vítaspyrnu í uppbótartíma í 1-0 tapi KA gegn Víking og því er hann hér. Miðað við hvernig hann hefur spilað til þessa á tímabilinu mun hann svara með frábærum leik gegn Stjörnunni í kvöld.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.