Kynnti fjórar vörður í átt að af­léttingu sam­komu­tak­markana

Tekur áætlunin mið af framgangi bólusetningar og er áætlað að aflétta megi öllum innanlandstakmörkunum síðari hlutann í júní þegar um 75 prósent þjóðarinnar hafi fengið minnst einn bóluefnaskammt. 

Svandís sagði í samtali við fréttastofu að fyrsta viðmiðinu hafi verið náð þegar 25 prósent Íslendinga höfðu fengið fyrri bólusetningu. Áætlunin er birt með fyrirvara um mat sóttvarnalæknis á aðstæðum og stöðu faraldursins á hverjum tíma.

Fyrri hluti maí

Áætlað er að snemma í maí verði unnt að stíga annað skref til rýmkunar á innanlandstakmörkunum þegar minnst 35 prósent landsmanna hafa fengið bólusetningu. 

Gert er ráð fyrir að hægt verði að hækka fjöldatakmarkanir og er miðað við mörk á bilinu 20 til 200 manns. Einnig er gert ráð fyrir rýmri undanþágu frá nálægðarreglu og fjöldatakmörkun fyrir tiltekna starfsemi, að því er fram kemur í tilkynningu frá heilbrigðisráðuneytinu. 

Síðari hluti maí

Síðari hlutann í maí er gert ráð fyrir að minnst 50 prósent landsmanna hafi fengið bólusetningu og að bólusetning einstaklinga með undirliggjandi sjúkdóma sé komin vel á veg. Þá verði unnt að rýmka fjöldatakmarkanir til muna, sem verði einhvers staðar á bilinu 100 til 1.000 manns. Samhliða verði nálægðarmörk færð úr tveimur metrum í einn.

Síðari hluti júní

Líkt og áður segir er gert ráð fyrir að aflétta megi öllum takmörkunum innanlands seinni hlutann í júní. Á þeim tíma er gert ráð fyrir að búið verði að bólusetja um 75 prósent landsmanna að minnsta kosti einu sinni.

„Þá getum við aflétt öllum sóttvarnaráðstöfunum innanlands. Það er þessum takmörkunum sem við þekkjum best, þó að við munum væntanlega áfram þurfa að nota spritt og grímur í tilteknum tilvikum og þurfum að passa okkur eftir sem áður,“ sagði Svandís í samtali við fréttastofu að loknum ríkisstjórnarfundi í morgun. 

Sjá má viðtalið í heild sinni að neðan. 

Fyrsta skref afléttingar hefur þegar verið tekið með tilslökunum á samkomutakmörkunum og í skólastarfi sem tóku gildi 15. apríl síðastliðinn. Þá voru fjöldatakmörk aukin úr 10 í 20 manns, opnað var fyrir starfsemi sundlauga, líkamsræktarstöðva með takmörkunum, hægt var að hefja sviðslistastarf á ný og sitthvað fleira.

Svandís sagði að við séum nú að horfa til þess að geta lagt upp þessar „vörður“ og sagt frá þeim. Nú séum við komin með „vegvísi“ fyrir þessar síðustu vikur.

Hún áréttaði þó að þetta sé allt saman háð þeim fyrirvara að það sé verkefni og hlutverk sóttvarnalæknis að gera tillögu til ráðherra. 

„Hann metur stöðu faraldursins. Það er alltaf þannig og verður að vera þannig. En við teljum að við höfum nægjanlegar forsendur til að segja þetta svona.“

Þá sé áætlunin ekki síður háð því að bólusetningaáætlun gangi sem skyldi. 

Fréttin hefur verið uppfærð.