ESB í mál við AstraZeneca

Fyrirtækið er sakað um að hafa afhent færri skammta af bóluefni gegn kórónuveirunni en um var samið.

Stefan de Keersmaecker, upplýsingafulltrúi framkvæmdastjórnarinnar, sagði á fréttamannafundi að AstraZeneca hafi ekki virt skilmála samningsins. „Það sem skiptir okkur máli er að við viljum að þeir skammtar sem við eigum rétt á séu afhentir tímanlega, eins og var lofað. Þess vegna hefur framkvæmdastjórnin höfðað mál fyrir hönd aðildarríkjanna 27, sem eru samstíga í málinu.“

Samkvæmt AP-fréttaveitunni var samið um kaup á minnst 300 milljónum skammta. AstraZeneca hafi afhent 30 milljónir á fyrsta ársfjórðungi og býst við að afhenda 70 milljónir á öðrum ársfjórðungi. Mun minna en þær 180 milljónir sem um var samið.

Framleiðandinn hefur áður sagt að tölurnar í samningnum hafi ekki verið bein loforð heldur markmið. Vandamál sem komu upp þegar framleiðslugetan var aukin útskýri töfina.

„AstraZeneca hefur að öllu leyti staðið við samninginn við Evrópusambandið og mun svara fyrir sig fyrir dómi. Að okkar mati eru þessar ásakanir tilhæfulausar og við fögnum tækifærinu til að leysa þetta mál eins fljótt og auðið er,“ sagði í tilkynningu frá AstraZeneca í dag.