Engar tak­markanir á notkun Jans­sen bólu­efnisins

Lyfjastofnun Evrópu (EMA) gaf út í gær að hugsanleg tengsl væru milli bólusetningar með efninu og sjaldgæfra blóðtappa. Þá er farið fram á að óvenjulegir blóðtappar með blóðflögufæð verði skráðir sem afar sjaldgæf aukaverkun efnisins. Beðið var með notkun þess hér á landi á meðan athugun EMA stóð yfir en dreifing þess er nú hafin á ný í Evrópu.

Kamilla sagði að fyrirliggjandi gögn bendi til að blóðtappatilfellin séu mjög sjaldgæf og enn fátíðari en í tilviki bóluefnis AstraZeneca. Þó beri að taka mið af því að færri hafi fengið efni Janssen fram að þessu.

Þá bætti hún við að ekki liggi fyrir nógu margar tilkynningar um blóðtappa í kjölfar bólusetningar með Janssen til meta hvort ákveðnir aldurshópar eða kyn sé í aukinni áhættu.

Kamilla sagði enn fremur ljóst að ávinningur af notkun efnisins vegi þyngra en áhættan af aukaverkunum þess. 

Rannsóknir standa nú yfir á bólusetningu barna gegn kórónuveirunni og er fyrst von á niðurstöðum úr rannsókn Pfizer sem nær til barna á aldrinum tólf til fimmtán ára. Kamilla á von á því að bóluefni muni fá markaðsleyfi til notkunar hjá börnum að loknum fullnægjandi rannsóknum. Í kjölfarið verði byrjað að bjóða börnum í áhættuhópum í bólusetningu hér á landi.  

Notkun AstraZeneca miðist við íslenskar forsendur

Aðspurð um það hvers vegna Íslendingar fari ekki sömu leið og Norðmenn sem hafa stöðvað notkun AstraZeneca bóluefnisins í kjölfar tilkynninga um sjaldgæfa blóðtappa sagði Kamilla að ekki hafi sést dæmi um alvarleg tilfelli hér. 

„Í Noregi hafa þeir séð tilfelli sem eru mjög alvarleg og í hærri tíðni heldur en aðrar þjóðir og þeir verða að taka sínar ákvarðanir byggðar á sinni reynslu og við tökum þær byggt á okkar reynslu og gögnum annars staðar frá,“ sagði Kamilla.

Hún bætti við að hér hafi verið ákveðið að fara þá leið að gefa þeim sem hafa mögulega aukna áhættu annað bóluefni.

„Það er ekki svo að áhættan sé svo mikil að þetta sé gagnslaust bóluefni. Áhættan af því að fá alvarlega Covid-sýkingu er áfram miklu miklu meiri heldur en áhættan af þessum blóðtöppum.“

Þórólfur Guðnason sóttvarnalæknir benti jafnframt á að Noregur og Danmörk séu einu löndin í Evrópu sem hafi stöðvað notkun AstraZeneca bóluefnisins. Hér hefur verið miðað við að bóluefnið verði notað til að bólusetja einstaklinga sem hafa náð 60 ára aldri og sagði Kamilla líklegt að aldursmörkin verði færð neðar. 

Greint var frá því í morgun að Ísland myndi fá sextán þúsund skammta af bóluefni AstraZeneca að láni frá Noregi. Kamilla telur ólíklegt að þörf verði á því að fá fleiri skammta að láni þar sem grænt ljós hafi nú fengist á notkun Janssen efnisins en sagði ákvörðunina liggja hjá heilbrigðisráðuneytinu.

Fréttin hefur verið uppfærð.