Viðskipti innlent

Norðfirðingar vilja stækka hlut sinn í Síldarvinnslunni

Kristján Már Unnarsson skrifar
Frá athafnasvæði Síldarvinnslunnar í Norðfjarðarhöfn. Verið er að landa loðnu úr Beiti.
Frá athafnasvæði Síldarvinnslunnar í Norðfjarðarhöfn. Verið er að landa loðnu úr Beiti. Einar Árnason

Áhugi er meðal heimamanna á Norðfirði að auka hlut sinn á ný í Síldarvinnslunni, stærsta sjávarútvegsfyrirtæki Austfjarða, nú þegar stefnt er að skráningu fyrirtækisins á hlutabréfamarkað.

Síldarvinnslan, sem er 64 ára gamalt fyrirtæki, var áður í breiðri eign Norðfirðinga. Núna er Samherji stærsti hluthafinn, með um 44 prósenta hlut, en Samherjamenn hafa gefið það út að þeir vilji dreifðara eignarhald. Næst stærsti hluthafinn, Kjálkanes, með um 34 prósent, hyggst einnig minnka við sig.

Séð yfir Neskaupstað. Norðfirðingar stofnuðu Síldarvinnsluna árið 1957.Einar Árnason

Stjórn Síldarvinnslunnar kynnti í febrúar að stefnt væri að skráningu félagsins í Kauphöll Íslands á fyrri hluta þessa árs. Í Neskaupstað er hvatt til þess að heimamenn grípi tækifærið. Einkum er horft til SÚN, Samvinnufélags útgerðarmanna, sem fram undir síðustu aldamót var helsti hluthafinn, en er núna sá þriðji stærsti með ellefu prósenta hlut.

„SÚN er búið að ákveða það að við ætlum allavega ekki að selja neitt af okkar hlutabréfum. Við ætlum frekar að huga að því að kaupa hlutabréf, þó að ekki sé búið að ákveða hversu mikið það verður,“ segir Guðmundur R. Gíslason, framkvæmdastjóri SÚN, í fréttum Stöðvar 2.

Guðmundur R. Gíslason, framkvæmdastjóri Samvinnufélags útgerðarmanna í Neskaupstað, SÚN.Einar Árnason

„Auðvitað vonast ég til að heimamenn sjái tækifæri í þessu, að kaupa eignarhluti,“ segir Jón Björn Hákonarson, bæjarstjóri Fjarðabyggðar.

„Það sem er náttúrlega mikilvægt, hvort sem það er Síldarvinnslan eða önnur fyrirtæki, er að það sé bara traustur og góður eigendahópur. Ég held að það sé lykilatriðið,“ segir Gunnþór Ingvason, forstjóri Síldarvinnslunnar, en hún er með 360 manns í vinnu og næst stærsta fyrirtæki Austurlands, á eftir Alcoa Fjarðaáli.

Gunnþór Ingvason, forstjóri Síldarvinnslunnar.Einar Árnason

„Við höfum séð það bara hér í uppbyggingu á Síldarvinnslunni síðustu áratugina að þar hefur skipt gríðarlega miklu máli að hafa framsýna eigendur og öfluga stjórn að baki félaginu,“ segir Gunnþór.

Í gegnum Samvinnufélagið hafa Norðfirðingar séð hluta af arðinum af Síldarvinnslunni renna til samfélagsverkefna. Í síðustu viku sögðum við frá skrifstofuklasanum Múlanum. Útsýnispallur við vitann austast í Neskaupstað er annað dæmi og SÚN, ásamt Síldarvinnslunni, lagði einnig til fé á móti ríkinu til að malbika Norðfjarðarflugvöll.

Jón Björn Hákonarson, bæjarstjóri Fjarðabyggðar.Einar Árnason

„Við höfum styrkt sveitarfélagið, eða greiddum það nánast að fullu, að klæða félagsheimilið.

Svo erum við með menningar- og viðurkenningarsjóð sem við veitum úr tvisvar á ári. Þar erum við oft að veita tugum milljóna bara í menningar- og íþróttaverkefni og ýmislegt fleira,“ segir framkvæmdastjóri SÚN.

„Að sjálfsögðu vill maður sjá þetta sem mest í eigu heimamanna. En fyrst og síðast að þetta sé góður rekstur. Þannig tryggir maður hann í sessi,“ segir bæjarstjórinn.

Hér má sjá frétt Stöðvar 2:


Tengdar fréttir

Múlanum ætlað að fjölga Norðfirðingum

Norðfirðingar vonast til að heimta aftur brottflutta íbúa til baka og fá fjölda nýrra starfa með skrifstofuklasa og nýsköpunarmiðstöð sem búið er að opna í Neskaupstað.

Segir loðnuvertíðina stóran lottóvinning fyrir þjóðarbúið

Núna er áætlað að loðnuvertíðin skili yfir tuttugu milljarða króna útflutningsverðmætum. Þetta kom fram í viðtali við Gunnþór Ingvason, forstjóra Síldarvinnslunnar í Neskaupstað, en þangað var Börkur NK í kvöld á leið með síðasta loðnufarm Austfjarða á þessari vertíð, 1.900 tonna farm. Þá virðist einungis Ísfélag Vestmannaeyja eiga eftir um þúsund tonn óveidd af sínum kvóta.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
KVIKA
3,12
25
452.643
SJOVA
2,27
25
193.534
ARION
2,16
46
1.361.687
MAREL
2,04
39
582.450
SIMINN
1,85
14
350.533

Mesta lækkun dagsins


Félag
Br.%
Fjöldi
Velta*
SKEL
-2,34
2
3.406
ICESEA
-1,18
7
13.751
BRIM
0
6
15.074
ORIGO
0
4
13.235
EIM
0
9
215.249
Velkomin á Vísi. Þessi vefur notar vafrakökur. Sjá nánar.